ԱՄՆ նախագահ Դոնալդ Թրամփի փեսան՝ Ջարեդ Քուշները, մտադիր է հաջորդ շաբաթ այցելել Իսրայել՝ Գազայի հատվածում տիրող իրավիճակի շուրջ բանակցությունների համար, հաղորդում է Axios-ը՝ հղում անելով աղբյուրներին։ Հրապարակման համաձայն՝ Սպիտակ տունը և ԱՄՆ-ի նախաձեռնած Խաղաղության խորհուրդը «փորձում են առաջ շարժվել Գազայի պլանի հաջորդ փուլով, որը կենտրոնանում է ՀԱՄԱՍ-ի զինաթափման և հնարավոր է՝ իսրայելական ուժերի դուրսբերման վրա»։
Պորտալը ընդգծում է, որ «Նեթանյահուի կառավարությունը չափազանց կասկածամիտ է ԱՄՆ-ի՝ Գազայի պլանի նկատմամբ, և հոկտեմբերին Իսրայելի խորհրդարանական ընտրությունները հարցերը դարձնում են ավելի քաղաքականապես զգայուն»։ «Մենք ունենք ռազմավարական նպատակներ, սակայն Իսրայելը որոշակի մտահոգություններ է հայտնել պլանի վերաբերյալ, և մենք ցանկանում ենք խոսել նրանց հետ՝ մեր միջև համակարգումն ապահովելու համար», – նշել է ամերիկացի պաշտոնյան։ Նա ասել է, որ վերոնշյալ այցի ժամկետները կարող են փոփոխվել։
Քուշների հետ Իսրայել կմեկնի նաև Գազայի հարցերով Խաղաղության խորհրդի գերագույն ներկայացուցիչ Նիկոլայ Մլադենովը։ Պորտալի տվյալներով՝ Քուշները կհանդիպի Նեթանյահուի և Իսրայելի այլ պաշտոնյաների հետ։ Նա կարող է նաև այցելել Մերձավոր Արևելքի այլ երկրներ։
