Վրաստանա-ռուսական սահմանին գտնվող «Դարիալի» մաքսակետում գործարկվել է հնարավոր տարերային աղետի մասին վաղ նախազգուշացման ավտոմատ համակարգը, ինչից հետո անցակետի տարածքից տարհանվել է ողջ անձնակազմը, հայտնում է «Նովոստի-Գրուզիա»-ն։
Ինչպես հայտնել են Վրաստանի ՆԳՆ-ից, անցակետի գոտուց դուրս են բերվել պարեկային և սահմանային ոստիկանության աշխատակիցները, մաքսավորներն ու մասնավոր ընկերությունների աշխատողները։
Վրաստանի ֆինանսների նախարարության Եկամուտների ծառայությունը հայտարարել է մաքսային ընթացակարգերի լիակատար դադարեցման մասին։ Ժամանակավորապես դադարեցվել են ինչպես բեռների ներմուծումն ու արտահանումը, այնպես էլ պետական սահմանով մարդկանց անցումը։
Իշխանությունները նաև, որպես կանխարգելիչ միջոց, Գվելեթի գյուղի մոտ երկու ուղղություններով ամբողջությամբ փակել են բոլոր տեսակի տրանսպորտային միջոցների երթևեկությունը։
Դևդորակի գետի կիրճում տեղադրված ազդարարման համակարգը արձագանքում է ջրի մակարդակի փոփոխություններին։ Տագնապի գործարկման ճշգրիտ պատճառները դեռևս պարզվում են։
Իշխանությունները հայտարարել են, որ անցակետը լիարժեք կվերականգնի աշխատանքը ռիսկերի նվազումից և տարերային աղետի սպառնալիքի վերացումից հետո։
Ավելի վաղ օդերևութաբանները նախազգուշացրել էին, որ օգոստոսի 13–15-ը Վրաստանում եղանակը կտրուկ կվատանա։
