ԱՄՆ նախագահական ընտրություններում Դոնալդ Թրամփի հաղթանակը ռեկորդային 63,5 միլիարդ դոլարով ավելացրել է մոլորակի տասը ամենահարուստ մարդկանց կարողությունը, գրում է Bloomberg-ը։ Սա «Միլիարդատերերի ինդեքսի» պատմության մեջ ամենամեծ օրական աճն է, որը գործակալությունը վարում է 2012 թվականից ի վեր։
Տասնյակում ամենամեծ շահույթն ստացել է աշխարհի ամենահարուստ մարդը՝ Իլոն Մասկը. նրա կարողությունն աճել է 10,1%-ով՝ հասնելով 290,3 մլրդ դոլարի։ Oracle-ի գործադիր տնօրեն Լարի Էլիսոնը և Berkshire Hathaway-ի գործադիր տնօրեն Ուորեն Բաֆեթը դարձել են 5,4-ական տոկոսով ավելի հարուստ․ նրանց ունեցվածքն աճել է համապատասխանաբար մինչև 193,5 միլիարդ դոլար և 147,8 միլիարդ դոլար:Google-ի հիմնադիրներ Լարի Փեյջի և Սերգեյ Բրինի ակտիվներն աճել են 3,6%-ով՝ համապատասխանաբար մինչև 158,3 և 149,1 մլրդ դոլար։
Amazon-ի հիմնադիր Ջեֆ Բեզոսը, ով Bloomberg-ի ինդեքսում զբաղեցնում է երկրորդ տեղը, իր կարողությունն ավելացրել է 3,2%-ով՝ հասցնելով 228,3 մլրդ դոլարի։
