Վրաստանի վարչապետ Իրակլի Կոբախիձեն հայտարարել է, որ հանրապետությունը մտադիր է մինչև 2030 թվականը դառնալ Եվրամիության անդամ։
«Մենք հավակնոտ նպատակ ունենք՝ դառնալ Եվրամիության անդամ մինչև 2030 թվականը, երբ Վրաստանը բոլոր առումներով՝ ժողովրդավարություն, մարդու իրավունքներ, տնտեսություն և այլն, ամենապատրաստը կլինի ԵՄ-ին անդամակցելու թեկնածու երկրներից»,- ասել է Կոբախիձեն Բուդապեշտում վրացի լրագրողներին։
Հինգշաբթի նա ելույթ է ունեցել Հունգարիայի մայրաքաղաքում կայացած Եվրամիության գագաթնաժողովի լիագումար նիստում և հանդիպումներ է ունեցել եվրոպական մի շարք երկրների ղեկավարների հետ։«Ես հնարավորություն ունեցա ելույթ ունենալ գագաթնաժողովի թեմատիկ հարթակում և լիագումար նիստում, որտեղ ես խոսեցի Վրաստանում ընթացիկ գործընթացների, ինչպես նաև Եվրամիության հետ հարաբերությունների մասին»,- ասել է Կոբախիձեն։
Մեկնաբանելով եվրոպացի առաջնորդների պահանջները՝ չեղյալ համարել Վրաստանում ընդունված օտարերկրյա գործակալների մասին օրենքները և ԼԳԲՏ համայնքի քարոզչության արգելքը, Կոբախիձեն ասել է, որ վրացական կողմին փաստարկներ են պետք, որոնք ընդդիմախոսները չեն ներկայացնում։
«Եթե ինչ-որ մեկը դժգոհություններ ունի մեր ընդունած օրենքներից, ապա պետք է կոնկրետ ներկայացնի, թե ինչն իրեն դուր չի գալիս, ինչ հոդված, ինչ նորմ»,- ասել է Վրաստանի վարչապետը։
