ԱՄՆ նախագահ Դոնալդ Թրամփը հայտարարել է, որ Միացյալ Նահանգները պատրաստվում է վերահսկել ռազմավարական նշանակություն ունեցող Հորմուզի նեղուցը և դրա դիմաց վճար գանձել։
«Մենք պահպանել ենք նեղուցը 50 տարի և դրա համար երբեք չենք վարձատրվել։ Մենք այն պահպանում էինք ձրի, բայց հիմա գումար կվաստակենք»,- ասել է Թրամփը՝ հավելելով, որ ԱՄՆ-ն, ամենայն հավանականությամբ, կստանձնի «նեղուցի պահապանի» դերը։
Միևնույն ժամանակ Իրանը հայտարարել է, որ երբեք թույլ չի տա ԱՄՆ-ին միջամտել Հորմուզի նեղուցի կառավարմանը։ Այդ մասին հայտարարել է Իրանի զինված ուժերի «Հաթամ ալ-Անբիա» կենտրոնական շտաբի մամուլի խոսնակ Իբրահիմ Զոլֆողարին։
Նրա խոսքով՝ Իրանը վճռականորեն կճնշի ԱՄՆ զինված ուժերի կողմից տանկերների և առևտրային նավերի տարանցման համար ստեղծվող ցանկացած խոչընդոտ կամ սպառնալիք։ Զոլֆողարին նաև հայտարարել է, որ Իրանի կողմից սահմանված երթուղիներից դուրս շարժվող և առանց թույլտվության նավարկող նավերը կստանան կոշտ պատասխան։
«Մենք զգուշացնում ենք տարածաշրջանային երկրների ղեկավարներին. ԱՄՆ զինված ուժերին տրամադրվող ցանկացած լոգիստիկ աջակցություն և համագործակցություն կհամարվի պատերազմ Իրանի ինքնիշխանության և ազգային անվտանգության դեմ։ Եթե պատերազմը ընդլայնվի, դրա կրակը կծածկի ամբողջ տարածաշրջանը»,- հայտարարել է նա։
Զոլֆողարին ընդգծել է, որ տարածաշրջանում հակամարտության հնարավոր ընդլայնման և անվտանգության վատթարացման պատասխանատվությունը կրում են ԱՄՆ-ն և նրա հետ համագործակցող երկրները։
