Ճապոնիայի իրավապահ մարմինները ուժեղացված անվտանգության միջոցառումներ են ձեռնարկել փետրվարի 8-ին նախատեսված ցածր պալատի վաղաժամ ընտրությունների նախաշեմին՝ հաշվի առնելով 2022 թվականի հուլիսին նախկին վարչապետ Սինձո Աբեի սպանությունը նախընտրական ելույթի ժամանակ, հաղորդում է Kyodo գործակալությունը։
Հունվարի 27-ին ընտրարշավի առաջին օրը վարչապետ Սանաե Տակաիչին, ով ղեկավարում է երկրում իշխող Ճապոնիայի Լիբերալ-դեմոկրատական կուսակցությունը (ԼԴԿ), համատեղ անցկացրել է քարոզարշավային ժողով՝ կոալիցիայում ընդգրկված «Ճապոնիայի նորոգման հասարակություն» կուսակցության համապետական նախագահ Հիրոֆումի Յոշիմուրայի հետ Տոկիոյի Ակիհաբարա շրջանի մուտքի մոտ։ Մուտքի մոտ գոյացել են երկար հերթեր, քանի որ ոստիկանությունը ստուգում էր անձնական պայուսակները։
Ոստիկանությունը հետևում է նաև սոցիալական ցանցերի օգտատերերին, որտեղ ընտրարշավի մեկնարկից հետո ավելացել են քաղաքական գործիչների հանդեպ ուղղված սպառնալիքները։ Իրավապահները բացահայտում են հնարավոր վտանգավոր օգտատերերին և որոշ դեպքերում պաշտոնական նախազգուշացում են տալիս։
Հետագայում, ըստ Kyodo-ի, նախատեսվում է սոցիալական ցանցերի վերլուծության համար կիրառել արհեստական բանականություն։
