Թուրքիայի ներքին գործերի նախարար Ալի Երլիկայան հայտարարել է, որ անվտանգության ուժերը 21 նահանգներում ձերբակալել են «Իսլամական պետություն» խմբավորման 357 ենթադրյալ անդամի։
Ստամբուլի գլխավոր դատախազությունը երեքշաբթի օրը հայտարարել է, որ հակաահաբեկչական գործողության շրջանակներում ձերբակալվել է 110 կասկածյալ, այդ թվում՝ Նոր տարվան ուղղված հարձակումներ պլանավորող անձինք։
Անցյալ շաբաթ հայտարարվեց, որ ձերբակալման օրդերներ են տրվել 137 մարդու նկատմամբ, որոնք կասկածվում են Թուրքիայում Սուրբ Ծննդյան և Նոր տարվա օրերին ահաբեկչական հարձակումներ պլանավորելու մեջ՝ ԴԱԻՇ-ի հրահրմամբ։ 115 մարդ արդեն ձերբակալվել է։
«Ոստիկանությունը 21 նահանգներում անցկացված գործողության ընթացքում ձերբակալել է 357 կասկածյալ ԴԱԻՇ-ի անդամի», - գրել է նախարար X սոցիալական ցանցում։
