Հունգարիայի վարչապետ Վիկտոր Օրբանը նոյեմբերի 7-ին Սպիտակ տանը կհանդիպի ԱՄՆ նախագահ Դոնալդ Թրամփի հետ։ Կողմերը կքննարկեն երկկողմ հարաբերությունները և Ռուսաստան-ԱՄՆ գագաթնաժողովի կազմակերպման հարցերը, հայտարարել է Օրբանի աշխատակազմի ղեկավար Գերգելի Գուլյասը։
«Հունգարիայի վարչապետը նոյեմբերի 7-ին Սպիտակ տանը կլինի ԱՄՆ նախագահ Դոնալդ Թրամփի հյուրը։ Հանդիպման նախապատրաստական աշխատանքները լիարժեք ընթացքի մեջ են։ Նպատակն է ապահովել, որ այս խորհրդակցությունները օգտակար լինեն հունգարա-ամերիկյան հարաբերությունների և հունգարական տնտեսության համար», - ասել է Գուլյասը կառավարության ճեպազրույցի ժամանակ։
Նրա խոսքով՝ հանդիպման ժամանակ նախատեսվում է համաձայնագրեր կնքել «էներգետիկ, ռազմաարդյունաբերական, տնտեսական և ֆինանսական համագործակցության ոլորտներում»։
«Առաջարկվող հանդիպումը նաև հնարավորություն է տալիս երկու պետությունների ղեկավարներին փոխանակվել գաղափարներով խաղաղության հնարավոր ուղու վերաբերյալ և որոշել, թե գործողությունների ինչ ընթացք կարող է հանգեցնել Ռուսաստանի և Միացյալ Նահանգների ղեկավարների հանդիպմանը, և դրա միջոցով՝ ռուս-ուկրաինական խաղաղության համաձայնագրի», - նշել է Գուիյասը։
