Գազայի հատվածում Իսրայելի կողմից իրականացված օդային հարվածների հետևանքով վերջին 24 ժամվա ընթացքում զոհերի թիվը հասել է 44-ի, հայտնում է «Ալ Մայադին» հեռուստաալիքը՝ հղում անելով պաղեստինյան անկլավի բժշկական աղբյուրներին։
Ամենաշատ զոհերի թիվը գրանցվել է Նուսեյրաթի և Էլ-Բրեյջի փախստականների ճամբարներում, որտեղ զոհվել է 18 մարդ, վիրավորվել՝ ավելի քան 50-ը։ Բոլորը տեղափոխվել են Ալ-Աուդա հիվանդանոց։
Վերջին 24 ժամվա ընթացքում իսրայելական ուժերը հարձակվել են անկլավի մոտ 100 թիրախի վրա, իսկ Խան Յունիսի և Ռաֆահի հարավային շրջանները ենթարկվել են ինտենսիվ ավիահարվածների և հրետակոծությունների, որտեղ արմատական ՀԱՄԱՍ շարժման զինյալները խախտել են հրադադարը։
Ավելի վաղ Պաղեստինի առողջապահության նախարարությունը հայտնել էր, որ հոկտեմբերի 10-ին հրադադարի ուժի մեջ մտնելուց ի վեր Գազայի հատվածում զոհվել է 51 մարդ, վիրավորվել՝ ավելի քան 150-ը։ Գազայի իշխանությունները մեղադրել են Իսրայելին ութ օրվա ընթացքում հրադադարը 47 անգամ խախտելու մեջ։
