ԱՄՆ նախագահ Դոնալդ Թրամփը հայտարարել է, որ Վլադիմիր Զելենսկին հոկտեմբերի 17-ին մտադիր է խնդրել իրեն Ուկրաինային Tomahawk թևավոր հրթիռներ մատակարարել։«Նախագահը գալիս է հոկտեմբերի 17-ին, և ես գիտեմ, թե ինչ է նա ասելու։ Նա զենք է ուզում։
Նա կցանկանար ձեռք բերել Tomahawk», – ասել է Թրամփը՝ պատասխանելով լրագրողների հարցերին Սպիտակ տանը իր արգենտինացի գործընկեր Խավիեր Միլեի հետ հանդիպման ժամանակ։
«Բոլորը նույնպես ուզում են դրանք։ Մենք շատ Tomahawk ունենք։ Ձեզ Tomahawk պետք չէ՞», – կատակով հարցրեց Թրամփը Միլեին՝ հավելելով, որ դրանք կարող են օգտագործվել Արգենտինայի ընդդիմության դեմ։
Ավելի վաղ ԱՄՆ նախագահը հայտարարել էր, որ նախքան Tomahawk հրթիռները Կիևին փոխանցելու վերաբերյալ վերջնական որոշում կայացնելը, նա, հավանաբար, պետք է այդ հարցը քննարկի Ռուսաստանի նախագահի հետ։
Հոկտեմբերի 6-ին ամերիկացի առաջնորդը հայտարարեց, որ փաստացի որոշում է կայացրել Tomahawk հրթիռները Ուկրաինա փոխանցելու հնարավորության վերաբերյալ, սակայն մանրամասներ չի հայտնել։
