Կալիֆոռնիայի և Ցյուրիխի համալսարանների գիտնականները պարզել են, որ ցողունային բջիջների անմիջապես ուղեղի մեջ փոխպատվաստումը կարող է արագացնել վնասված հատվածների վերականգնումը: Ուսումնասիրության արդյունքները հրապարակվել են Nature Communications (NatCom) ամսագրում:
Ցողունային բջիջները բջիջներ են, որոնք ընդունակ են զարգանալու նյարդային համակարգի տարբեր տեսակի բջիջների, այդ թվում՝ նյարդային բջիջների և գլիալ բջիջների (ուղեղի օժանդակ բջիջներ): Հետազոտողները մարդու արյան բջիջները վերապլանավորել են նյարդային ցողունային բջիջների և փոխպատվաստել դրանք լաբորատոր մկների ուղեղի վնասված հատվածներ՝ իշեմիկ կաթվածից մեկ շաբաթ անց:
Փոխպատվաստումից հինգ շաբաթ անց կենդանիների մոտ նկատվել է բորբոքման նվազում, արյան անոթների ամրապնդում, նեյրոնների միջև կապերի մասնակի վերականգնում և արյուն-ուղեղային պատնեշի թափանցելիության նվազում:
Արյան-ուղեղային պատնեշը կիսաթափանցիկ պատնեշ է արյան և նյարդային հյուսվածքի միջև, որը կարգավորում է նյութերի փոխադրումը շրջանառության համակարգի և կենտրոնական նյարդային համակարգի միջև: Կաթվածը առաջացնում է նյութերի արտահոսք. արյան բաղադրիչներ, որոնք սովորաբար չէին հասնի ուղեղի հյուսվածք, օրինակ՝ սպիտակուցներ, իոններ և իմունային բջիջներ, ներխուժում են:
Փոխպատվաստված բջիջների զգալի մասը վերածվել է ԳԱԿԱէրգիկ նեյրոնների՝ բջիջների, որոնք, ինչպես ցույց են տվել վաղ ուսումնասիրությունները, նպաստում են ուղեղի ֆունկցիայի վերականգնմանը կաթվածից հետո: Շարժումների համակարգչային վերլուծության միջոցով գիտնականները նաև գրանցել են քայլվածքի բարելավում և նուրբ շարժիչ հմտությունների վերականգնում փորձարկվող կենդանիների մոտ:
Հետազոտությունը ներկայումս շարունակվում է, գիտնականները ուսումնասիրում են թերապիայի ազդեցության տևողությունը և մեթոդը մարդկանց վրա կլինիկական կիրառման համար հարմարեցնելու հնարավորությունը:
Թարգմանությունը՝ Euromedia24.com-ի
