Հայաստանի ազգային հավաքականի և Պորտուգալիայի թիմերի նախախաղային մարզումները չեն անցկացվելու Վազգեն Սարգսյանի անվան «Հանրապետական» մարզադաշտում, այլ կանցկացվեն Ավանի Ֆուտբոլի ակադեմիայի մարզադաշտում։Պատճառը այն է, որ մարզադաշտի խոտածածկույթը դեռևս չի վերականգնվել։
Այն վնասվել էր օգոստոսին Ջենիֆեր Լոպեսի համերգի ընթացքում, երբ երկրպագուները համերգի ժամանակ ոտքերով տրորեցին խոտածածկույթը, և մինչև այժմ որևէ մեկը չի պատժվել վնասների համար։Ֆուտբոլի Հայաստանի ազգային հավաքականի երկրպագուների FAF շարժման հիմնադիր Սերգեյ Ջանջոյանը նշել է, որ նման կարևոր հանդիպման համար մարզումների տեղափոխումը անընդունելի է, քանի որ ֆուտբոլիստները պետք է հարմարվեն այն խաղադաշտին, որտեղ խաղալու են։
Ջանջոյանն ընդգծել է, որ մրցակից թիմը կարող էր բողոք ներկայացնել ՈւԵՖԱ՝ վնասվածքների բարձր վտանգի պատճառով, ինչը կարող էր հանգեցնել խաղի փոփոխման կամ չեղարկման։Միևնույն ժամանակ, Հայաստան–Պորտուգալիա խաղի շուրջ մեծ դժգոհություն է առաջացել նաև տոմսերի վաճառքի գործընթացի պատճառով։
Օգոստոսի 14-ին տոմսերի վաճառքի մեկնարկից հետո ՀՖՖ-ի կայքում տեխնիկական խնդիրներ են առաջացել։ Չնայած ՀՖՖ-ի հայտարարությանը, որ առաջին 2,500 տոմսերը արագ վաճառվել են, բազմաթիվ երկրպագուներ չեն կարողացել տոմսեր ձեռք բերել, իսկ հետագայում ներդրված հերթագրման համակարգը նույնպես չի գործել պատշաճ կերպով։
Արդյունքում, երկրպագուները տոմսերը գնելու այլընտրանք գտան միայն սև շուկայում, որտեղ վաճառվում էր բավականին բարձր գներով, նույնիսկ 1,400 դոլարով։ Փորձագետների ու երկրպագուների խոսքով՝ տեղի ունեցած խառնաշփոթը լուրջ կազմակերպչական խնդիրների արդյունք է։
Մանե Գևորգյան
