Միջազգային գիտական խումբը պարզել է, որ գոտևորող քորի (herpes zoster) դեմ պատվաստումը կապված է սրտանոթային դեպքերի, այդ թվում՝ ինսուլտի և սրտամկանի ինֆարկտի ռիսկի վիճակագրորեն նշանակալի նվազման հետ։ Այս մասին տեղեկացնում է Եվրոպական սրտաբանական ընկերությունը (European Society of Cardiology, ESC)։
Հետազոտության հեղինակները վերլուծել են 19 ուսումնասիրության տվյալներ, որոնց թվում էին ութ դիտողական ուսումնասիրություն և մեկ կլինիկական փորձարկում։ Վերլուծությունը ցույց է տվել, որ 18 տարեկանից բարձր անձանց շրջանում herpes zoster-ի դեմ պատվաստումը նվազեցնում է սրտանոթային բարդությունների ռիսկը 18%-ով, իսկ 50 տարեկանից բարձր անձանց շրջանում՝ 16%-ով։ Բացարձակ թվերով սա համապատասխանում է 1,2–2,2 դեպքի պակասին (ինսուլտ կամ ինֆարկտ) յուրաքանչյուր 1000 մարդ-տարի դիտարկման ընթացքում։
«Մենք գտանք ապացույցներ, որ գոտևորող քորի դեմ պատվաստումը կապված է սրտանոթային դեպքերի նվազման հետ։ Սակայն անհրաժեշտ են լրացուցիչ ուսումնասիրություններ՝ պարզելու համար՝ արդյոք սա ուղղակիորեն պայմանավորված է պատվաստմամբ», — նշել է հետազոտության հեղինակ, բժիշկ Չարլզ Ուիլյամսը, ով հանդիսանում է GSK ընկերության պատվաստանյութերի գլոբալ բժշկական բաժնի տնօրենը։
Ավելի վաղ արդեն ապացուցվել էր, որ գոտևորող քորով վարակված լինելուց հետո մոտակա ժամանակահատվածում ինսուլտի և ինֆարկտի ռիսկն աճում է։ Գիտնականները սա կապում են այն հանգամանքի հետ, որ վարիցելա-զոստեր վիրուսը (որը նաև ջրծաղիկի հարուցիչն է) կարող է ներթափանցել արյունատար անոթների պատերին՝ առաջացնելով բորբոքում և դրանց վերաձևավորում։ Պատվաստումը կարող է կանխել վիրուսի ռեակտիվացումն ու, հետևաբար, նվազեցնել բարդությունների հավանականությունը։
Թարգմանությունը՝ Euromedia24.com-ի
