Վրաստանի հինգերորդ և վեցերորդ գումարման խորհրդարանի պատգամավոր Լևան Գաչեչիլաձեն մահացել է երկարատև հիվանդությունից հետո։ Այս մասին հայտնել է Վրաստանի հանրային հեռարձակողի առաջին ալիքը՝ հղում անելով քաղաքական գործչի հարազատներին և ընկերներին։
Գաչեչիլաձեն վերջերս հիվանդ էր։ Նա բուժվել էր Թուրքիայում, սակայն ապարդյուն։ Նա 61 տարեկան էր։
Գաչեչիլաձեն իր քաղաքական կարիերան սկսել է 1999 թվականին՝ դառնալով Վրաստանի հինգերորդ գումարման խորհրդարանի անդամ։ Նա խորհրդարան է մտել նախկին նախագահ Էդուարդ Շևարդնաձեի կողմից ստեղծված «Վրաստանի քաղաքացիների միություն» իշխող կուսակցության կուսակցական ցուցակով։
2004 թվականին Գաչեչիլաձեն կրկին ընտրվեց խորհրդարան, բայց այս անգամ՝ որպես մեծամասնական ընտրակարգով Թբիլիսիի Վակե ընտրատարածքից։
Նա Վրաստանի նախկին նախագահ Միխեիլ Սաակաշվիլիի և նրա կառավարության կոշտ հակառակորդներից մեկն էր։
2008 թվականին Գաչեչիլաձեն Վրաստանի նախագահի թեկնածու էր և Սաակաշվիլիի գլխավոր մրցակիցը։ Նախագահական ընտրություններում նա ստացավ ձայների 25.7%-ը և զբաղեցրեց երկրորդ տեղը։
