Հնդկաստանի հարավային Կարնատակա նահանգի բժիշկները աշխարհում առաջին անգամ գրանցել են եզակի արյան խումբ՝ նոր հակածնով։ Հայտնագործությունը կատարվել է Կոլար շրջանից 38-ամյա հիվանդի սրտի վիրահատության նախապատրաստական աշխատանքների ժամանակ, հաղորդում է The New Indian Express-ը։
Սկզբում կնոջ արյան խումբը որոշվել էր որպես O Rh+, որը համարվում է ամենատարածվածը։ Սակայն, ստանդարտ O-դրական արյան նմուշներից ոչ մեկը հարմար չէր փոխներարկման համար։
Կոլար կլինիկայի վիրաբույժ Անկիտ Մաթուրի խոսքով՝ բժիշկները պարզել են, որ հիվանդի արյունը «պանռեակտիվ» է՝ անհամատեղելի բոլոր առկա թեստային նմուշների հետ։ Նրանք չեն կարողացել դոնոր գտնել կնոջ 20 հարազատների շրջանում։
Վիրահատությունը, ի վերջո, հաջող է անցել և առանց արյան փոխներարկման, սակայն կլինիկական դեպքի անսովորությունը գրավել է մասնագետների ուշադրությունը։ Նմուշները ուղարկվել են Բրիստոլի (Մեծ Բրիտանիա) միջազգային արյան խմբերի հղման լաբորատորիա և Բանգալորի արյան կենտրոն։ Տասը ամիս տևած մոլեկուլային հետազոտություններից հետո գիտնականները հաստատել են CRIB անվամբ նոր հակածնի գոյությունը։ Անսովոր կլինիկական դեպքը ներկայացվել է նաև Արյան փոխներարկման միջազգային ընկերության (ISBT) 35-րդ տարածաշրջանային կոնգրեսում Միլանում 2025 թվականի հունիսին։
Բանգալորի արյան կենտրոնը և Հնդկաստանի բժշկական հետազոտությունների խորհուրդը արդեն սկսել են կազմել հազվագյուտ արյան խմբեր ունեցող դոնորների գրանցամատյան, այդ թվում՝ նոր CRIB հակածնի պոտենցիալ կրողների։ Որոշ մասնագետներ կարծում են, որ մուտացիան կարող էր առաջանալ մերձավոր ազգականների միջև ամուսնությունների հետևանքով, որոնք դեռևս կիրառվում են Հնդկաստանի որոշ մասերում։
Թարգմանությունը՝ Euromedia24.com-ի
