Մեծ Բրիտանիան մեկ տարվա ընթացքում երկրից արտաքսել է 35,000 անօրինական միգրանտների։ Այս տվյալները մեջբերել է Մեծ Բրիտանիայի վարչապետ Քիր Սթարմերը՝ Շոտլանդիայի Թըրնբերի քաղաքում ԱՄՆ նախագահ Դոնալդ Թրամփի հետ հանդիպման ժամանակ լրագրողների հարցերին պատասխանելիս։
«Լեյբորիստական կուսակցության գլխավորած կառավարության առաջին տարում մենք վերադարձրել ենք 35,000 անօրինական միգրանտների, ուստի, մենք շատ ուրախ ենք, որ վերադարձնում ենք այն մարդկանց, ովքեր իրավունք չունեն այստեղ գտնվելու», -ասել է Սթարմերը, որը գլխավորում է Լեյբորիստական կուսակցությունը, որը հաղթել է 2024 թվականի հուլիսին կայացած խորհրդարանական ընտրություններում։
Թրամփը նաև անդրադարձել է անօրինական միգրացիայի թեմային՝ կոչ անելով դադարեցնել Լա Մանշի հատումը փոքր փչովի նավակներով։
«Նավակները լի են վատ մարդկանցով, սովորաբար այդպես է լինում, քանի որ մյուս երկրները չեն ուղարկում իրենց լավագույն քաղաքացիներին, նրանք ուղարկում են մարդկանց, որոնց չեն ուզում, նրանք հիմար չեն», - ասել է ԱՄՆ նախագահը։ Նա պնդել է, որ այդ մարդկանց մեջ կարելի է գտնել «մարդասպաններ, թմրավաճառներ»։ «Եվ նրանք ուղարկում են նրանց ձեզ մոտ, նրանք ուղարկում են նրանց մեզ մոտ։ Եվ դուք պետք է դադարեցնեք դա», - ասել է Թրամփը։
Մեծ Բրիտանիայի Ներքին գործերի նախարարության տվյալներով՝ 2025 թվականի սկզբից ի վեր ավելի քան 21,000 անօրինական միգրանտներ Մեծ Բրիտանիա են անցել փչովի նավակներով Լա Մանշով։
