ԱՄՆ նախագահ Դոնալդ Թրամփը այսօրվա համար նախատեսել է հեռախոսազրույց Ռուսաստանի նախագահ Վլադիմիր Պուտինի հետ՝ փորձելով հասնել Ուկրաինայում հրադադարի։ Զրույցը տեղի է ունենում այն պահին, երբ եվրոպական առաջնորդները հրապարակայնորեն կոչ են անում Մոսկվային ընդունել 30-օրյա առանց նախապայմանների հրադադար։ Թրամփը, որն իր պաշտոնավարման ընթացքում խաղաղարարի կերպարով է հանդես գալիս, հայտարարել է, որ ցանկանում է դադարեցնել «արյունահեղությունը», որը շաբաթական միջինը խլում է հազարավոր ռուս և ուկրաինացի զինվորների կյանք։ Նա նախատեսում է զրուցել նաև Ուկրաինայի նախագահ Զելենսկու և ՆԱՏՕ-ի մի շարք առաջնորդների հետ։
Մինչ այդ, Ռուսաստանը կիրակի օրը գործարկել է պատերազմի ամենախոշոր դրոնային հարձակումը Ուկրաինայի վրա։ Ուկրաինայի հետախուզությունը նաև զգուշացրել է, որ Մոսկվան կարող է նույնիսկ միջմայրցամաքային հրթիռ կիրառել, փոխանցում է Reuters-ը։
Եվրոպացի ղեկավարներն անհանգստացած են, որ Թրամփն ու Պուտինը կարող են պայմանավորվել մի լուծման շուրջ, որը Ուկրաինային կհանգեցնի տարածքային զիջումների՝ առանց իրական անվտանգության երաշխիքների։ Մինչ արևմուտքը կոչ է անում լիարժեք խաղաղություն, Պուտինը շարունակում է պնդել, որ Ուկրաինան հրաժարվի ՆԱՏՕ-ից և դուրս բերի իր զորքերը՝ Մոսկվայի կողմից վերահսկվող տարածքներից։
