Փարաքարցիների հետ խնդիր չկա, Euromedia24-ի հետ զրույցում հավաստիացրեց Փարաքարի համայնքապետի թեկնածու, «Ապրելու երկիր» և «Հաղթանակ» կուսակցությունների կազմած «Միասնություն» դաշինքի նախընտրական ցուցակը գլխավորող Վալոդյա Գրիգորյանը՝ մեկնաբանելով այն փաստը, որ իր գլխավորած դաշինքի ցուցակում ընդգրկված ավագանու թեկնածուների մեծ մասը Փարաքարի բնակիչներ չեն:
Նշենք, որ մեր տեղեկություններով՝ Փարաքարի ավագանու արտահերթ ընտրություններին մասնակցող «Միասնություն» դաշինքի նախընտրական ցուցակում մոտ 10-15 հոգի, հատկապես՝ անցողիկ տեղերը զբաղեցնող թեկնածուները, փարաքարցիներ չեն: Դաշինքի ցուցակը գլխավորող Վալոդյա Գրիգորյանը հաստատեց այս տեղեկությունը՝ նշելով, որ Փարաքարի բնակիչ չհանդիսացող թեկնածուները ցուցակում գուցե ավելի շատ լինեն: Իսկ փարաքարցիները, նրա խոսքով, ցուցակում 6-7 հոգի են:
«Ոչ մի խնդիր չկա: Ես մշտապես անհատական շփումներ եմ ունենում Փարաքար համայնքի բնակիչների հետ: Այստեղ ինչ-որ խնդիր չկա: Ցուցակում կան փարաքարցիներ, թաիրովցիներ: Եթե չեմ սխալվում՝ 6-7 հոգի», - պարզաբանեց համայնքապետի թեկնածուն:
Պաշտոնապես հրապարակված տվյալներով՝ «Միասնություն» դաշինքի ցուցակի առաջին երեք հորիզոնականները զբաղեցնում են Վալոդյա Գրիգորյանը,
Օնիկ Ախվերդյանը և Էմմա Թորոսյանը:
Կառավարությունը Արմավիրի մարզի Փարաքար խոշորացված համայնքի ավագանու լիազորությունները դադարեցրել էր 2025 թ. հունվարի 15-ին՝ որոշում ընդունելով ավագանու արտահերթ ընտրություններ անցկացնելու մասին: Ավելի վաղ իշխող «Քաղաքացիական պայմանագիր» կուսակցության անդամ Լյուդվիգ Գյուլնազարյանը հրաժարական էր տվել Փարաքարի համայնքապետի պաշտոնից՝ նոյեմբերին Երևանի Աջափնյակ համայնքում տեղի ունեցած կրակոցների ու սպանության ժամանակ դեպքի վայրում լինելու պատճառով: Լրատվամիջոցները հայտնել էին, որ Գյուլնազարյանը վիճաբանության մասնակիցներից է եղել, նույնիսկ հրազենային վնասվածք է ստացել: Հունվարի 11-13-ը ՔՊ-ի կողմից անցկացված նախնական ընտրությունների՝ փրայմերիզի արդյունքներով Լյուդվիգ Գյուլնազարյանը մարզպետի կողմից նշանակվեց Փարաքարի համայնքապետի ժամանակավոր պաշտոնակատար:
2022-ին իշխող ուժը մեծ դժվարությամբ էր կարողացել հասնել տեղական իշխանության Փարաքարում: ՔՊ-ն պարտվել էր 2021-ին այս համայնքում տեղի ունեցած ավագանու ընտրություններում: Ամենաշատ ձայները ստացել էր «Ապրելու երկիր» կուսակցությունը, որին այդպես էլ չհաջողվեց իր թեկնածուին նշանակել համայնքապետ: ՔՊ-ն և «Դավիթ Մինասյան» դաշինքը միացան ու երկարատև պայքարից ու իրավական քաշքշուկից հետո կարողացան իրենց համատեղ թեկնածուին դարձնել համայնքի ղեկավար: ՔՊ-ն ամենաքիչ ձայներն ուներ ավագանիում, բայց քանի որ նպատակ ուներ ամեն գնով պահելու իշխանությունը Փարաքարում, գնաց համագործակցության «Դավիթ Մինասյան» դաշինքի հետ: 2022 թ. հունվարին Փարաքարի համայնքապետ ընտրվեց Դավիթ Մինասյանը, որն էլ, ըստ պայմանավորվածության, երկուսուկես տարի պաշտոնավարելուց հետո այդ պաշտոնը փոխանցեց ՔՊ ներկայացուցիչ Լյուդվիգ Գյուլնազարյանին:
Փարաքարի ավագանու արտահերթ ընտրությունները տեղի կունենան կիրակի օրը՝ մարտի 30-ին: «Միասնություն» դաշինքից բացի՝ այս ընտրություններին հայտ են ներկայացրել նաև «Քաղաքացիական պայմանագիր», «Ազգային առաջընթաց» և «Կայունություն» կուսակցությունները: Փարաքարում համայնքապետի ՔՊ թեկնածուն Լյուդվիգ Գյուլնազարյանն է:
