«Փաստ» օրաթերթը գրում է.
«Երբ մարդու ատամը ցավում է, դիմում է ատամնաբույժի: Երբ Ռուսաստանդ է ցավում, պետք է դիմես ռուսաստանագետի, երբ Ամերիկադ է ցավում, պետք է դիմես ամերիկագետի»,- ասում է հասարակական-քաղաքական գործիչ, «Իմ երկիր, իմ Հայաստան» հասարակական շարժման ղեկավար Մհեր Ավետիսյանը և տեղեկացնում, որ սկսում է պոդքասթների շարք, որպեսզի մեր հանրությունն ավելի տեղյակ լինի՝ ինչ է իրականում կատարվում մեր շուրջ:
Առաջին պոդքասթին Ավետիսյանը հրավիրել է Ռուսաստանի ամենահայտնի ամերիկագետներից մեկին՝ քաղաքագետ Մալեկ Դուդակովին և զրուցել աշխարհաքաղաքական ներկա զարգացումների մասին:
Ի մասնավորի, խոսելով Կովկասում ԱՄՆ հետաքրքրությունների մասին՝ Դուդակովն ասել է, որ, իր կարծիքով, Թրամփի ու նրա վարչակազմի համար ներկա պահին Հարավային Կովկասը առաջնահերթ տարածաշրջան չէ, քանի որ ԱՄՆ-ի հետաքրքրություններն առաջին հերթին այլ տարածաշրջաններում են՝ Չինաստան, Լատինական Ամերիկա, Ասիա, Գրենլանդիա, Մերձավոր Արևելք և այլն:
Ինչ վերաբերում է Հայաստանի իշխանությունների՝ արտաքին քաղաքական կուրսի փոփոխության հայտարարություններին, ապա Դուդակովի կարծիքով, Հայաստանի իշխանությունը հայտնվել է ճիշտ նույն թակարդում, ինչ մի շարք այլ երկրների ղեկավարներ, որոնք կախվածություն ունեն Արևմուտքից, որտեղ կայացնում են որոշումներ, նշյալ երկրներին ինչ-որ գումարներ տալիս և պարտադրում կատարել համապատասխան հրահանգները:
«Ձգտել դեպի ժամանակակից Եվրոպա՝ ամենատրամաբանական որոշումը չէ»,- ասում է Դուդակովն ու նշում, որ Հայաստանը պետք է ավելի զգույշ քաղաքականություն վարի, իսկ այն, ինչ ճանապարհով փորձում են գնալ Հայաստանի իշխանությունները, ոչ մի լավ բանի չի բերի:
