«Ժողովուրդ» օրաթերթը գրում է.
«Նիկոլ Փաշինյանի #հատիկառհատիկ օպերացիայով իշխանությունները հերթական անգամ հանրության աչքերին թոզ փչելու գործընթաց են սկսել։
Իրականում նա իր «սրտի» նորահայտ օլիգարխներից ոչինչ չի վերցնում ու հետ տալիս պետությանը:
«Ժողովուրդ» օրաթերթը արձանագրեց, որ օրերս Նիկոլ Փաշինյանը գրել էր․ «#հատիկառհատիկ Դատարանի վճռով Երևան քաղաքի Ծիծեռնակաբերդի խճուղուն հարող տարածքում գտնվող՝ 12 հազար 400 քմ մակերեսով հողամասի նկատմամբ, որպես ապօրինի ձեռքբերված գույք, վերականգնվել է Հայաստանի Հանրապետության սեփականության իրավունքը:
Շուկայականին մոտարկված արժեքը՝ 730 միլիոն դրամ»:
Թե Ծիծեռնակաբերդի խճուղուն հարող որ տարածքի մասին է խոսքը, անհայտ է, սակայն այս ամենի կուլմինացիան այլ է։ 2019 թվականին, երբ խոսվում էր հետհեղափոխական Հայաստանի փայլուն ապագայի մասին, Նիկոլ Փաշինյանը վանկարկում էր, որ հատիկ առ հատիկ ամեն բան հետ են բերելու, «ո՛չ մի մուկ, ո՛չ մի ձուկ չի պլստալու»։
Սակայն տարիներ անց ստացվեց այնպես, որ իշխանության «սրտի» որոշ օլիգարխներ հեշտ ու հանգիստ «պլստացին»։ Այդ օլիգարխներից մեկն էլ Դավիթ Երեմյանն է, ով նույն 2019 թվականին (Փաշինյանի՝ «ամեն բան հետ բերելու» հայտարարության տարում), հանրության ճնշումներին դեմ գնալով, իշխանության հովանավորչությունը վայելելով, սեփականաշնորհեց պետական գույք հանդիսացող Կարեն Դեմիրճյանի անվան մարզահամերգային համալիրի շենքի մի հատվածը՝ բացելով այնտեղ գերթանկարժեք «Լիվինգսթոն» ռեստորանը։
«Ժողովուրդ» օրաթերթը գրել էր, որ Տիգրան Ավինյանի ընկեր դարձած Դավիթ Երեմյանն արտոնյալ գործողություններով է աչքի ընկնում:
Իշխանությունը սկսել է պետական գնումներ կնքել հենց «Երեմյան Փրոջեքթս»-ի հետ, պետական պատվիրակությունների ճաշերը, ընթրիքները կազմակերպվում են «Երեմյան Փրոջեքթս»-ին պատկանող ռեստորաններում:
Ինչ վերաբերում է խախտումներով կառուցված «Լիվինգսթոն» ռեստորանին, ապա Աննա Հակոբյանը բիզնեսմենների հետ ճաշկերույթ ունեցավ հենց այդտեղ, ՔՊ-ն իր դրամահավաքներից մեկը անցկացրեց «Լիվինգսթոն»-ում:
Ստացվում է, որ հատիկ առ հատիկ վերցված ապօրինի գույքն արդյունքում սեփականաշնորհվում է իշխանամերձ շրջանակի կողմից և մատուցվում իբրև «հաղթանակ նախկինների դեմ»»:
Մանրամասները՝ «Ժողովուրդ» օրաթերթի այսօրվա համարում:
