Գործող իշխանությունների ընդհանուր քաղաքականությունը միտված է թուրք–ադրբեջանական տանդեմի շահերը սպասարկելուն և թուրք–ադրբեջանական տանդեմի շահերից է բխում, որ հայ ժողովուրդը մոռանա իր նկատմամբ իրականացված ոճրագործությունների մասին և համակերպվի հավերժական զոհի, երկրորդ սորտի կարգավիճակին։
Այս մասին լրագրողների հետ զրույցում ասաց «Հայաքվե» նախաձեռնության համակարգող Ավետիք Չալաբյանն՝ անդրադառնալով Բաքվում ապօրինաբար պահվող՝ Արցախի ռազմաքաղաքական ղեկավարության և այլ պատանդների կեղծ դատավարություններին ու տեղի ունեցողի նկատմամբ ՀՀ իշխանությունների արձագանքին։
«Այս ամենի հետ մենք չենք համակերպվելու, մենք հետամուտ ենք լինելու՝ պայքարելու արդարության վերականգման համար, վերականգնելու այս ոճրագործություններից տուժած մարդկանց իրավունքները։ Մարդիկ իրական ողբերգությունների են ենթարկվել, մարդ են կորցրել, ունեցվածք, առողջություն, տեղահանվել են և շատերը, կարևոր է արձանագրել, հոգեկան առողջություն են կորցրել․ շատերն իրենց նսեմացված, ջարդված, դեպրեսիայի ենթարկված են զգում։ Մենք չենք կարող սրա հետ համակերպվել»,– ասաց Չալաբյանը։
Նա նշեց, որ այսօր Բաքվի բանտերում մեզնից յուրաքանչուրը կարող է լինել, քան որ հազարավոր մարդիկ են պայքարել Արցախի ազատագրման համար։
«Իրականում այսօր Բաքվի դատարան կոչեցյալում փորձում են ցուցմունքներ կորզել ՀՀ–ի դեմ, որպեսզի Հայաստանի դեմ հայցեր բարձրացվեն և ամենավատն այն է, որ արդարացվի ՀՀ–ի դեմ հնարավոր ագրեսիաները։ Ակնհայտ է, որ թուրք–ադրբեջանական տանդեմը չի ուզում բավարարվել նրանով, ինչ այս ընթացքում խլել է մեր ժողովրդից։ Չպետք է տրվենք կեղծ խաղաղության պայմանագրի պատրանքներին, ակնհայտորեն դա նրանց համար հայ ժողովրդին ստրկացնելու փուլերից մեկնէ լինելու»,– նշեց Չալաբյանը։
