Գերմանիայի արտաքին գործերի նախարար Աննալենա Բերբոքը դեմ է արտահայտվել ԱՄՆ նախագահ Դոնալդ Թրամփի՝ Գազայի հատվածում պաղեստինցիներին արաբական երկրներ մշտական բնակեցնելու գաղափարին և ասել է, որ պաղեստինցիներին Գազայից վտարելը անընդունելի է և հակասում է միջազգային իրավունքին:
Բերբոքը կոչ է արել ստեղծել «իրական քաղաքական հեռանկար», որտեղ Գազայում պաղեստինյան արմատական ՀԱՄԱՍ շարժման զինյալներն այլևս չպետք է որևէ դեր խաղան ապագայում:
«Միևնույն ժամանակ, ակնհայտ է՝ Գազան, ինչպես Հորդանան գետի Արևմտյան ափը և Արևելյան Երուսաղեմը, պատկանում են պաղեստինցիներին», - լրագրողներին ասաց Գերմանիայի արտգործնախարարը:
«Գազայից պաղեստինցի խաղաղ բնակիչների վտարումը ոչ միայն անընդունելի և հակասող կլինի միջազգային իրավունքին, այլև կհանգեցնի նոր տառապանքների և նոր ատելության», - հայտարարել է Բուրբոքը։
Միևնույն ժամանակ, նախարարը նշել է, որ «Գազայի հատվածը պետք է հնարավորինս արագ վերականգնվի»։
Դա, նրա խոսքով, կպահանջի հսկայական միջազգային ջանքեր։ «Մենք՝ եվրոպացիներս, պատրաստ ենք մեր ներդրումն ունենալ ԱՄՆ-ի և տարածաշրջանի մեր գործընկերների հետ»,- վստահեցրել է Գերմանիայի ԱԳՆ ղեկավարը։
Նա նշել է, որ Գազայի խաղաղ բնակչությունը «օգնության կարիք ունի իր հողի վրա ապագայի համար՝ անվտանգության, արժանապատվության և Իսրայելի հետ խաղաղ գոյակցության համար»:
