Միասնական տեսլականով դեպի զարգացած Գորիս
Զբոսաշրջության ոլորտի զարգացման նոր հեռանկարներ են ուրվագծվել Գորիսում։ Համայնքի ղեկավար Առուշ Առուշանյանի և հյուրանոցային բիզնեսի ներկայացուցիչների հանդիպման ընթացքում քննարկվել են ոչ միայն ընթացիկ խնդիրները, այլև մշակվել զարգացման հստակ ռազմավարություն։
Առուշ Առուշանյանը նշել է , որ 2025 թվականի համար արդեն սահմանվել է հավակնոտ օրակարգ։ Գորիսը պետք է վերածվի ոչ միայն զբոսաշրջային, այլև էկոլոգիապես մաքուր ու կանաչ քաղաքի։
Առաջիկա 15 օրվա ընթացքում համայնքապետարանը կհրապարակի 2025 թվականի միջոցառումների տարեկան պլանը։ Դրանից հետո կմեկնարկի ակտիվ աշխատանք տուրօպերատորների հետ՝ Գորիսը զբոսաշրջային շուկայում առավել մրցունակ դարձնելու նպատակով։
Հյուրանոցների ղեկավարները առաջարկել են կառավարության հետ համագործակցության նոր ձևաչափ՝ հանդես գալ պետական նշանակության միջոցառումները և հանդիպումները Գորիսում անցկացնելու նախաձեռնությամբ։ Սա հնարավորություն կտա քաղաքին դառնալ տարածաշրջանային նշանակության գործարար, մշակութային կենտրոն։
Հանդիպման մասնակիցները միակարծիք էին, որ պատերազմից հետո առաջացած մարտահրավերները նոր մոտեցումներ են պահանջում։ Միասնական տեսլականի շուրջ համախմբվելը և համակարգված գործելը դարձել է ժամանակի հրամայական։ Հյուրանոցային ոլորտի ներկայացուցիչները պատրաստակամություն են հայտնել ակտիվորեն մասնակցել քաղաքի զարգացման ծրագրերին։
Գորիսի համայնքապետարան
