Ֆրանսիան պետք է մասնակցի Ուկրաինայում խաղաղության վերաբերյալ ցանկացած բանակցությունների, հայտարարել է հանրապետության արտաքին գործերի նախարարության ղեկավար Ժան-Նոել Բարոն։
RTL ռադիոկայանին տված հարցազրույցում նախարարին հարցրել են, թե արդյոք Ֆրանսիան պատրաստ է բանակցությունների Ռուսաստանի նախագահ Վլադիմիր Պուտինի հետ, մինչդեռ ԱՄՆ նորընտիր նախագահ Դոնալդ Թրամփը հայտարարեց հնարավոր բանակցությունների մասին։
«Մենք միշտ ասել ենք, որ եթե ուկրաինացիները ցանկանան, ինչ-որ պահի Ռուսաստանը կարող է ներգրավվել բանակցություններում, մենք այս հարցում տաբու չունենք։
Կարևոր է, որ Ֆրանսիան մասնակցի եվրոպական անվտանգությանը վերաբերող ցանկացած բանակցությունների: Այն, ինչ այսօր տեղի է ունենում Ուկրաինայում, վերաբերում է այս երկրի տարածքային ամբողջականությանը, սակայն շոշափվում են նաև Եվրոպայի անմիջական անվտանգության շահերը»,- պատասխանել է նախարարը։
