Թբիլիսիի ոստիկանությունը քաղաքի կենտրոնում՝ Ռուսթավելի պողոտայում անցկացվող բողոքի ցույցի ժամանակ ձերբակալել է 107 մարդու, տուժել է 10 իրավապահ, նրանցից մեկն այրվածքներ է ստացել և գտնվում է հիվանդանոցում։
Այս մասին հայտնում է Sputnik գործակալության վրացական հարթակը՝ հղում կատարելով Վրաստանի ներքին գործերի նախարարության հայտարարությանը: Բողոքի ակցիան մայրաքաղաքում վերսկսվել է նոյեմբերի 29-ին՝ ժամը 19:00-ի սահմաններում։
Ընդդիմությունը, նրանց ակտիվիստները և շարքային քաղաքացիները բողոքում են Վրաստանի իշխանությունների՝ նոյեմբերի 28-ին կայացրած որոշման դեմ՝ օրակարգից հանելու Եվրամիությանը երկրի անդամակցության շուրջ բանակցությունների բացումը մինչև 2028 թվականը։ Հաղորդվում է, որ ուժայինները ցուցարարներին ստիպել են նահանջել դեպի մետրոյի Ռուսթավելի կայարան և սկսել են բերման ենթարկել նրանց։
«Չնայած ՆԳՆ-ի բազմաթիվ ահազանգերին՝ Ռուսթավելի պողոտայում՝ խորհրդարանի շենքի մոտ ակցիան մեկ անգամ չէ, որ դուրս է եկել «Ժողովների և ցույցերի մասին» օրենքով սահմանված սահմաններից»,-ասված է ՆԳՆ հաղորդագրության մեջ։
Վրաստանի ներքին գործերի նախարարության տվյալներով՝ 107 ցուցարար վարչական կարգով բերման է ենթարկվել մանր խուլիգանության և ոստիկանության հրահանգներին չենթարկվելու համար։
«Ռուսթավելիի պողոտայում գտնվող անձինք իրավապահների ուղղությամբ տարբեր իրեր, քարեր, պիրոտեխնիկա, ապակե շշեր և երկաթե առարկաներ են նետել»,-ասվում է հաղորդագրության մեջ։
Նշվում է, որ վաղ առավոտից Ռուսթավելիում աշխատում են կոմունալ ծառայությունները, ապամոնտաժում են նստարաններից, աղբամաններից, էլեկտրական սկուտերներից և այլ առարկաներից կառուցված բարիկադների մնացորդները։
