Ֆրանսիայի նախագահ Էմանուել Մակրոնը համաձայնել է չկատարել Իսրայելի վարչապետ Բենիամին Նեթանյահուի նկատմամբ Միջազգային քրեական դատարանի (ՄՔԴ) կալանավորման հրամանը՝ Լիբանանում հրադադարի համաձայնագրում դեր ունենալու դիմաց։ Այս մասին հայտնում է ֆրանսիական Le Point ամսագիրը՝ հղում անելով ֆրանսիացի առաջնորդին մոտ կանգնած աղբյուրին։
Հրապարակման համաձայն՝ հրամանի տրվելուց անմիջապես հետո Ֆրանսիայի նախագահը զանգահարել է Նեթանյահուին և հայտարարել, որ Փարիզը «պարտավոր է հարգել ՄՔԴ-ն և լիովին համագործակցել նրա հետ»։ Միևնույն ժամանակ, Մակրոնը հավելել է, ըստ ամսագրի զրուցակցի, որ ՄՔԴ-ի դրույթները «նախատեսում են անձեռնմխելիություն» դատարանի կալանքի օրդերից։
Այդ կապակցությամբ կողմերը քննարկել են Լիբանանում հրադադարի շուրջ ստեղծված իրավիճակը։ Նրանք համաձայնել են, որ Փարիզը «կարևոր դեր կունենա ՄԱԿ-ի Անվտանգության խորհրդի 1701 բանաձևի կատարման մոնիտորինգի հանձնաժողովում, որը կարգավորում է իրավիճակը Իսրայելի և Լիբանանի սահմանին»: Հենց այս հեռախոսազրույցի ընթացքում լուծվեցին Ֆրանսիայի և Իսրայելի միջև «վերջին տարաձայնությունները», ընդգծում է պարբերականը։ «Նեթանյահուին անձեռնմխելիության տրամադրումը Ֆրանսիայի համար գինն էր՝ խաղալու իր դերը Լիբանանի համաձայնագրում», - ասել է իսրայելական աղբյուրը։
Ավելի վաղ Ֆրանսիայի արտաքին գործերի նախարարությունը ասել էր, որ Նեթանյահուն չի ձերբակալվի ֆրանսիական տարածքում, չնայած ՄՔԴ-ի հրամանին: Հայտարարության մեջ ասվում է, որ, համաձայն ֆրանսիական օրենսդրության, Նեթանյահուն և մյուս նախարարներն ունեն անձեռնմխելիություն, որը հաշվի կառնվի, եթե ՄՔԴ-ն պահանջի նրան ձերբակալել և արտահանձնել։
