Գերմանիայի նախկին կանցլեր Անգելա Մերկելն ասել է, որ կարծում է, որ 2008 թվականին Բուխարեստում դաշինքի գագաթնաժողովում Ուկրաինային ՆԱՏՕ չընդունելու որոշումը ճիշտ էր, քանի որ Կիևի անդամակցությունն այդ կազմակերպությանը Ռուսաստանին կդրդի ռազմական գործողությունների:
«Մենք ռազմական հակամարտություն կտեսնեինք նույնիսկ ավելի վաղ: Ինձ համար բացարձակապես պարզ էր, որ Ռուսաստանի նախագահ Վլադիմիր Պուտինը ձեռքերը ծալած չէր նստի և չէր նայի, որ Ուկրաինան միանում է ՆԱՏՕ-ին: Եվ հետո Ուկրաինան, որպես երկիր, հաստատ այնքան պատրաստված չէր, որքան էր 2022 թվականի փետրվարին»,- ասել է Մերկելը BBC-ին տված հարցազրույցում։
Խոսելով Ուկրաինայի հակամարտության ներկա փուլի մասին՝ նախկին կանցլերը նշել է, որ անհրաժեշտ է «անել հնարավորը միջուկային զենքի օգտագործումը կանխելու համար»։
«Բարեբախտաբար, Չինաստանը նույնպես խոսեց այս մասին որոշ ժամանակ առաջ, մենք չպետք է վախենանք, բայց մենք պետք է ընդունենք, որ Ռուսաստանը ԱՄՆ-ի հետ մեկտեղ աշխարհի ամենամեծ միջուկային տերությունն է», - ընդգծել է նա:
Մերկելը նաև ավելացրել է, որ իշխանության տարիներին ինքը ձգտել է համագործակցել Ռուսաստանի Դաշնության հետ, այդ թվում՝ էներգետիկայի ոլորտում, քանի որ դա համահունչ է Գերմանիայի ազգային շահերին։ Նա ափսոսանք է հայտնել, որ Ուկրաինայում Ռուսաստանի հատուկ ռազմական գործողությունը հանգեցրել է Եվրոպայի և Ռուսաստանի Դաշնության միջև հարաբերությունների սառեցմանը։
