Ուրուգվայում կիրակի օրը ավարտվել է նախագահական ընտրությունների երկրորդ փուլի քվեարկությունը։ Ինչպես հաղորդում է Canal 5-ը, ընտրատեղամասերի փակումից 30 րոպե առաջ մասնակցությունը կազմել է շուրջ 82%:
Ընտրությունների օրը լուրջ միջադեպեր չեն գրանցվել։ Առաջիկա ժամերին սպասվում են ձայների հաշվարկի առաջին արդյունքները։ Ուրուգվայցիները ստիպված էին ընտրություն կատարել ձախ կենտրոնամետ «Լայն ճակատ» կոալիցիայի համար առաջադրվող Կանելոնեսի նախկին քաղաքապետ Յամանդա Օրսիի և իշխող աջ կենտրոնամետ «Ազգային կուսակցության» թեկնածու Ալվարո Դելգադոյի միջև:
Ե՛վ Օրսին, և՛ նրա քաղաքական հակառակորդը իրենց առաջնահերթություններից են համարում հանցավորության դեմ պայքարը, որի մակարդակը վերջին տարիներին բարձրացել է Ուրուգվայում, և թմրանյութերի տարանցումը երկրի տարածքով։
Օրսին խոստանում է նաև նոր աշխատատեղեր ստեղծել և բարձրացնել ցածր եկամուտ ունեցող աշխատողների աշխատավարձերը։
Արտաքին քաղաքականության մեջ նա որպես առաջնահերթություն ընդգծում է տարածաշրջանային կազմակերպությունների, այդ թվում՝ Հարավային Ամերիկայի ընդհանուր շուկայի (Մերկոսուր) շրջանակներում ինտեգրացիոն գործընթացների արագացման անհրաժեշտությունը։
