Սիրիայի արտաքին գործերի նախարար Ասադ ալ-Շեյբանին Դամասկոսում բանակցություններ է վարել ԵՄ արտաքին քաղաքական գերատեսչության ղեկավար Կայա Կալասի հետ: Քննարկվել են երկկողմ հարաբերությունները:
Լրատվամիջոցները նշում են, որ հանդիպումից հետո կայացած համատեղ մամուլի ասուլիսի ժամանակ ալ-Շեյբանին Եվրամիությանը կոչ է արել չեղարկել մնացած պատժամիջոցները և ընդլայնել համագործակցությունը երկրի վերականգնման գործում: Կալասն էլ հայտարարել է 51 մլն եվրոյի մոբիլիզացիայի մասին՝ ականազերծման և տարածքները պատերազմից հետո մնացած զինամթերքից մաքրելու համար:
Կալասի այցը Դամասկոս տեղի է ունեցել Նյու Յորքում Ալ-Շեյբանիի հետ հանդիպումից մի քանի օր անց: Եվրամիությունը վերջերս ընդլայնել է իր դիվանագիտական ներկայությունը Սիրիայում և 14 տարվա բացակայությունից հետո դեսպան է նշանակել Դամասկոսում: 2025 թվականի մայիսին ԵՄ-ն չեղարկել էր Սիրիայի նկատմամբ տնտեսական պատժամիջոցները։
