Ֆրանսիայի նախագահ Էմանուել Մակրոնը հայտարարել է, որ Ուկրաինայի անվտանգությունն անմիջականորեն կապված է Ֆրանսիայի և ամբողջ Եվրոպայի անվտանգության հետ, և կոչ է արել շարունակել ֆինանսական ու ռազմական աջակցությունը Կիևին՝ օգնելով նրան հաղթահարել ձմեռը և հասնել արդար ու կայուն խաղաղության։
Համաքաղաքացիներին հասցեագրված իր ուղերձում Մակրոնն ընդգծել է, որ եվրոպական երկրին իր կամքն ուժով պարտադրելու Ռուսաստանի փորձը թուլացնում է ամբողջ մայրցամաքը։
«Այն, ինչ դրված է վտանգի տակ Ուկրաինայում, անմիջականորեն առնչվում է մեզ։ Խոսքը մեր հավաքական անվտանգության մասին է։ Օգնելով Ուկրաինային պաշտպանվել՝ մենք պաշտպանում ենք Ֆրանսիան և ֆրանսիացի ժողովրդին», — հայտարարել է երկրի նախագահը։
Ըստ նրա, Ուկրաինան կրկին դարձել է հինգշաբթի և ուրբաթ Դուբլինում կայացած Եվրոպական քաղաքական համայնքի գագաթնաժողովի և Եվրոպական խորհրդի ոչ պաշտոնական հանդիպման քննարկումների առանցքային թեման։
Հանդիպումների արդյունքներով եվրոպական երկրները վերահաստատել են իրենց միասնականությունը երկու հիմնական առաջնահերթությունների շուրջ՝ օգնել Ուկրաինային հաղթահարել ձմեռը և համատեղ աշխատել արդար ու երկարատև խաղաղության հասնելու ուղղությամբ։
Մակրոնը նշել է, որ ամերիկացի ներկայացուցիչների հետ վերջին շփումները համոզել են իրեն, որ Ռուսաստանի նախագահ Վլադիմիր Պուտինը չի ցանկանում բանակցել։ Միաժամանակ, ինչպես պնդում է Ֆրանսիայի ղեկավարը, ռուսաստանյան բանակն առաջ չի շարժվում, այլ զգալի կորուստներ է կրում և որոշ ուղղություններում նույնիսկ նահանջում է։
Մակրոնի կարծիքով, Մոսկվան հույս ունի կոտրել Ուկրաինայի դիմադրությունը՝ ուժեղացնելով խաղաղ բնակչության դեմ հարվածները և փորձելով ձմռանը երկիրը թողնել առանց էլեկտրականության։
«Մեր պարտականությունն է խափանել այդ հաշվարկը», — ընդգծել է նա։
Դրա համար, հավելել է Ֆրանսիայի նախագահը, անհրաժեշտ է պահպանել Կիևին տրամադրվող ֆինանսական աջակցությունը և օգնել նրան պաշտպանել բնակչությանը, էլեկտրակայաններն ու էներգացանցերը։
Մակրոնը նաև զգուշացրել է Ուկրաինային տրամադրվող միջոցների կրճատման դեմ՝ հայտարարելով, որ նման մոտեցումն ի վերջո կհանգեցնի Կիևին անարդար խաղաղություն պարտադրելուն և ամբողջ Եվրոպայի համար սպառնալիքի պահպանմանը։
«Սա պարտվողական մտածելակերպ է։ Սա հաջորդ պատերազմի բաղադրատոմսն է։ Նման դիրքորոշումը չի կարող լինել Ֆրանսիայի դիրքորոշումը», — հայտարարել է նա։
Որպես երկրորդ առաջնահերթություն՝ Մակրոնը նշել է եվրոպական երկրների լիարժեք մասնակցությամբ արդար ու կայուն խաղաղության հասնելը։ Նրա վկայությամբ, Եվրոպական քաղաքական համայնքի գագաթնաժողովում 42 երկիր հավանություն է տվել այն սկզբունքների մասին հռչակագրին, որոնցով Եվրոպան պետք է առաջնորդվի անվտանգության հարցերում։ Նախագահը դա անվանել է Ֆրանսիայի նախաձեռնությամբ ընդունված պատմական որոշում։
Նա նաև հիշեցրել է «ցանկացողների կոալիցիայի» աշխատանքի մասին, որը ստեղծվել է 2025 թվականի սկզբին՝ Ուկրաինայի անվտանգության երաշխիքները նախապատրաստելու համար։ Ավելի վաղ Փարիզում ընդունված հռչակագիրը նախատեսում է աջակցություն ուկրաինական բանակին և բազմազգ ուժերի նախապատրաստում, որոնք կարող են տեղակայվել հրադադարից հետո։ Ներկայումս Լեհաստանում զորավարժություններ են անցկացվում, որոնք կոչված են ցուցադրելու անվտանգության ապահովման գործում իրենց ներդրումն ունենալու եվրոպական երկրների պատրաստակամությունը։
Մակրոնը հայտնել է, որ քննարկումների հաջորդ փուլը կկայանա հինգշաբթի՝ Բեռլինում։ Եվրոպան պետք է հստակ ներկայացնի, թե ինչպես է պատկերացնում անվտանգության հետպատերազմյան համակարգը, այդ թվում՝ Ռուսաստանի համար, ինչպես նաև որոշի, թե ինչ ներդրում է ակնկալում ԱՄՆ-ից մայրցամաքի երկարաժամկետ անվտանգության ապահովման գործում։
Ֆրանսիայի նախագահն ընդգծել է Ուկրաինայի դերը եվրոպական պաշտպանության ապագա համակարգում։
«Ուկրաինան, որն ունի սովորական սպառազինությամբ Եվրոպայի ամենամեծ բանակը, առանցքային դեր է խաղում ՆԱՏՕ-ի հետ, դաշինքի, որտեղ նրա տեղն է», — հայտարարել է Մակրոնը։
Նա եզրափակել է, որ Ֆրանսիայի և նրա եվրոպացի գործընկերների նպատակն է Ուկրաինայի համար ապահովել արդար ու կայուն խաղաղություն, այնուհետև այլ երկրների հետ համատեղ ամրապնդել Եվրոպայի ընդհանուր անվտանգության համակարգը։
