«Հրապարակ»-ը գրում է.Անվտանգության խորհրդի քարտուղարի պաշտոնին Արմեն Գրիգորյանի հրաժեշտից հետո իշխող ուժի սորոսական հատվածը երեկ սգի մեջ էր, իսկ ծպտյալ ռուսամետները՝ ցնծության։ Նիկոլ Փաշինյանի որոշմամբ, ամենակարկառուն սորոսական Արմեն Գրիգորյանը երեկ չվերանշանակվեց իր պաշտոնում` նրան կփոխարինի Ազգային ժողովի պաշտոնաթող նախագահ Ալեն Սիմոնյանը։
Չնայած տեղեկություններ կան, որ Փաշինյանը հատուկ Ալեն Սիմոնյանի համար է զոհաբերել Արմեն Գրիգորյանին, քանի որ որեւէ այլ հարմար պաշտոն չի գտել նրա համար, սակայն այս նշանակումը իշխող թիմում աշխարհաքաղաքական մասշտաբի վերլուծությունների առիթ էր դարձել։
Ալեն Սիմոնյանի համար քննարկվում էր փոխվարչապետի կամ հանրապետության նախագահի պաշտոններին նշանակելու հարցը, սակայն Փաշինյանը մերժել է, նախ, որովհետեւ չի ցանկացել նեղացնել առողջական խնդիրներ ունեցող Վահագն Խաչատուրյանին, իսկ փոխվարչապետի պաշտոնում էլ գիտի, որ Ալեն Սիմոնյանը չի ձգի` դա գրեթե շուրջօրյա աշխատանք է պահանջում եւ բոլորովին այլ գիտելիքներ, բայց չէր էլ ուզում նեղացնել իր հավատարիմ զինակցին, որ բոլոր ժամանակներում հնազանդորեն վարկաբեկվել է հանուն թիմի ու Նիկոլ Փաշինյանի: Ի վերջո, գտել են այս լուծումը․ սա, իհարկե, ոչ այնքան հեղինակավոր պաշտոն է, ժամանակին Արթուր Բաղդասարյանն էր այն զբաղեցնում` Սերժ Սարգսյանին մատուցած ծառայություններից հետո:
Հանուն արդարության պետք է նշել, որ Արմեն Գրիգորյանն իր գործունեությամբ բավականին կշիռ է տվել այդ պաշտոնին՝ մասնակցելով խաղաղության գործընթացի բանակցություններին եւ մինի ԱԳՆ դարձնելով իր ղեկավարած կառույցը` անգամ երբեմն ստվերում թողնելով Արարատ Միրզոյանին։Սակայն որոշ շրջանակներ, ինչպես նշեցինք, այս փոփոխությունից հեռուն գնացող հետեւություններ են անում։ Իշխանական ռուսամետները թեթեւացած շունչ են քաշում՝ կարծելով, թե Նիկոլ Փաշինյանը վերջապես քայլեր է անում Ռուսաստանի հետ փոխհարաբերությունները շտկելու ուղղությամբ, եւ սա է պատճառը, որ ազատվում է սորոսական Արմեն Գրիգորյանից, որին, ի դեպ, տարիներ առաջ նույն ռուսական շրջանակների պահանջով Փաշինյանը չկարողացավ նշանակել արտգործնախարար, անգամ՝ փոխնախարար, քանի որ ՌԴ-ում նրան Արեւմուտքի շպիոն էին համարում եւ կատեգորիկ դեմ էին այս նշանակմանը։
Իհարկե, Ալեն Սիմոնյանն էլ արդեն ռուսամետ գործչի համբավ չունի, որովհետեւ վերջին տարիներին մինչեւ վերջին խազը փչացրել է հարաբերությունները ռուս գործընկերների հետ` նիկոլական թեզեր կրկնելով, սակայն նա չունի նաեւ «յառի» սորոսականի կոչում, ինչն Արմեն Գրիգորյանի այցեքարտն էր։Մենք գրել էինք, որ իշխող թիմում մեծ անհանգստություններ կան, որ Ռուսաստանի համբերության բաժակը լցվում է, եւ առաջիկայում խոշոր սանկցիաների նոր ալիք է սկսվելու, մտածում են, թե Փաշինյանը որոշակիորեն «զադնի է դնում» կադրային այս փոփոխությամբ, եւ ամեն բան դեռ կորած չէ։ Նույն վարկածին համաձայն են նաեւ իշխող թիմի սորոսականները, որոնք երեկ պատերի տակ բմբլում էին Փաշինյանին՝ Ռուսաստանի գիրկը թռչելու համար։
Չի բացառվում, որ առաջիկայում կոշտ, քննադատական ելույթներ հնչեն ԱԺ ամբիոնից, եւ փորձեն կրկին վերականգնել իրենց փայաբաժինն իշխանությունում։Դե իսկ Արմեն Գրիգորյանը, մեր տեղեկություններով, դեսպան կնշանակվի որեւէ եվրոպական հեղինակավոր երկրում, նշվում է Մեծ Բրիտանիան, չնայած այնտեղ գործող դեսպան կա:
