ԵՄ դիվանագիտության ղեկավար Ժոզեպ Բորելն ամփոփել է Բրյուսելում կայացած Եվրամիության խորհրդի նիստի արդյունքները: Նրա խոսքով՝ օրակարգում են եղել Ուկրաինայի շուրջ զարգացումները, մասնավորապես՝ քաղաքացիական և էներգետիկ ենթակառուցվածքներին ռուսական հարվածները, հակաօդային պաշտպանության ոլորտում Կիևի կարիքները: Բորելը հայտնել է, որ սահմանափակումներ են կիրառվելու որոշ անձանց նկատմամբ, որոնք քարոզչական գործունեություն են ծավալում՝ թիրախավորելով Ուկրաինայի և եվրոպական երկրների քաղաքացիական հասարակությանը, փորձում արդարացնել Ռուսաստանի վարած պատերազմը: Քննարկվել է Մերձավոր Արևելքում իրավիճակը: Ըստ հաղորդագրության՝ ԵՄ նախարարները ոչ պաշտոնական շփում են ունեցել Կատարի, Հորդանանի, Սաուդյան Արաբիայի, Եգիպտոսի, Արաբական Միացյալ Էմիրությունների գործընկերների հետ։ Մտքեր են փոխանակվել խաղաղության հասնելու համար ջանքերը համատեղելու վերաբերյալ: ԵՄ-ն պահանջել է Իսրայելից՝ կատարել Արդարադատության միջազգային դատարանի որոշումը, որի համաձայն՝ այդ երկիրը պետք է դադարեցնի Եգիպտոսի հետ սահմանին գտնվող Ռաֆահ քաղաքում գործողությունները: Նախարարներն անդրադարձել են օտարերկրյա ազդեցության թափանցիկության մասին վիճահարույց օրինագծի ընդունման հետևանքով Վրաստանում ծավալվող զարգացումներին, շեշտել՝ այդ նախաձեռնությունը հակասում է Եվրամիության սկզբունքներին: Բորելը հավելել է՝ ԵՄ անդամ երկրներն ուսումնասիրում են օրինագծի ընդունման դեպքում կառույցի հնարավոր արձագանքը:
Բորելը ներկայացրել է Բրյուսելում կայացած Եվրամիության խորհրդի նիստի արդյունքները
28.05.2024 13:29 |
Կատեգորիա
Քաղաքական
