NASA-ն հայտարարել է, որ Boeing ընկերության Starliner տիեզերանավի առաջին փորձնական թռիչքը դասակարգվել է որպես «Type A mishap»՝ ամենաբարձր և վտանգավոր միջադեպերի կատեգորիային։ Նշվում է, որ այդ օրը «գրեթե ողբերգությամբ էր ավարտվելու»։
Starliner-ը 2024 թվականի հունիսի 5-ին տիեզերք էր տարել տիեզերագնացներ Սունի Ուիլյամսին և Բուտչ Ուիլմորին, որոնք պետք է 10 օր անցկացնեին Միջազգային տիեզերական կայանում։ Սակայն թռիչքի ընթացքում մի քանի շարժիչներ խափանվել էին, և տիեզերանավը ժամանակավորապես կորցրել էր կառավարման հնարավորությունը։
NASA-ն ի վերջո որոշել էր Starliner-ը վերադարձնել Երկիր առանց անձնակազմի։ Տիեզերագնացները կայանում մնացել էին շուրջ 9 ամիս և վերադարձել էին միայն 2025 թվականին՝ SpaceX ընկերության տիեզերանավով։
NASA-ում ընդունել են, որ միջադեպի լրջությունը սկզբում ամբողջությամբ չէր գնահատվել։ Այժմ գործակալությունը և Boeing-ը շարունակում են ուսումնասիրել խափանումների պատճառները, և մինչև խնդրի լուծումը Starliner-ը նորից տիեզերագնացներ չի տեղափոխի։
