ԱՄՆ ազգային անվտանգության բարձրաստիճան պաշտոնյաները շաբաթ օրը նախագահ Դոնալդ Թրամփին տեղեկացրել են ԱՄՆ զինված ուժերի կողմից Իրանին հարվածելու պատրաստակամության մասին, հաղորդում է CBS-ը՝ հղում անելով քննարկումներին ծանոթ աղբյուրներին։
Հեռուստաալիքի աղբյուրների համաձայն՝ զինվորականները Թրամփին տեղեկացրել են հնարավոր գործողության իրենց պատրաստակամության մասին, սակայն նախագահը դեռևս վերջնական որոշում չի կայացրել հարվածները սկսելու վերաբերյալ։ Աղբյուրները պարզաբանել են, որ առաջիկա օրերին գործողությունների տեխնիկական պատրաստվածության պայմաններում հնարավոր գործողության ժամկետը կարող է երկարաձգվել այս շաբաթավերջից հետո։
Ինչպես երեկ հաղորդել էր Wall Street Journal-ը՝ հղում անելով աղբյուրներին, Թրամփը քննարկում է Իրանի ռազմական և կառավարական օբյեկտների դեմ նախնական սահմանափակ հարված հասցնելու հնարավորությունը, որպեսզի նրանց ստիպի կնքել միջուկային համաձայնագիր, և եթե Իրանի իշխանությունները չհամաձայնվեն ուրանի հարստացումը դադարեցնելու Թրամփի պահանջների հետ, Միացյալ Նահանգները կպատասխանի լայնածավալ ռազմական արշավով։
