ԱՄՆ բանակը Միչիգան նահանգի Դետրոյթի ավտոսրահում ներկայացրել է Abrams M1E3 տանկի նոր տարբերակի նախատիպը։ Այն ունի նոր փոխանցման տուփ, հիբրիդային շարժիչ և առաջադեմ պաշտպանական համակարգեր, որոնք կարող են որսալ հրթիռներ,
հաղորդում է Bloomberg-ը։
Գործակալության տվյալներով՝ ինժեներներին հաջողվել է տանկի քաշը կրճատել 25%-ով, իսկ վառելիքի սպառումը՝ 50%-ով։ General Dynamics Land Systems-ը նոր մոդիֆիկացիայի մշակման վրա ծախսել է մոտ 75 միլիոն դոլար։ Գործակալությունը նշում է, որ տանկի մարտական խցիկը նախագծված է «Ֆորմուլա 1»-ի խցիկի ոճով։
ԱՄՆ բանակի շտաբի պետ, գեներալ Ռենդի Ջորջը, լրագրողներին ներկայացնելով նախատիպը, ասել է, որ տանկը «կարող կլինի ոչնչացնել քառորդ մղոն (0.4 կմ) հեռավորության վրա գտնվող թիրախը վայրկյանի տասներորդական մասում»։
«Այն կարող է խնձորը հարվածել երեք կիլոմետր հեռավորության վրա, ինչը լավ արդյունք է», - հավելել է գեներալը։ Նա ասել է, որ նոր մոդիֆիկացիան արդիականացրել է իր ողջ ծրագրային ապահովումը։ Այնուամենայնիվ, Ջորջը հրաժարվել է կանխատեսել Abrams M1E3-ի հնարավոր արժեքը։
Տանկը շահագործման կհանձնվի երկու տարի անց, հաղորդում է Bloomberg-ը։
