Գրենլանդիան չի զիջի Վաշինգտոնի ճնշմանը՝ չնայած ԱՄՆ նախագահ Դոնալդ Թրամփի կողմից մաքսատուրքեր սահմանելու սպառնալիքներին, հայտարարել է Գրենլանդիայի վարչապետ Յենս-Ֆրեդերիկ Նիլսենը։
Շաբաթ օրը ԱՄՆ նախագահը հայտարարեց փետրվարին Դանիայի, Նորվեգիայի, Շվեդիայի, Ֆրանսիայի, Գերմանիայի, Մեծ Բրիտանիայի, Նիդեռլանդների և Ֆինլանդիայի դեմ 10% մաքսատուրքի սահմանման մասին, որը հետագայում կբարձրանա մինչև 25% և ուժի մեջ կմնա մինչև Միացյալ Նահանգների կողմից Գրենլանդիայի գնման վերաբերյալ համաձայնագրի կնքումը։
«Գրենլանդիան ժողովրդավարական հասարակություն է՝ սեփական որոշումներ կայացնելու իրավունքով։ ԱՄՆ վերջին հայտարարությունները, այդ թվում՝ մաքսատուրքերի սպառնալիքները, չեն փոխում այս դիրքորոշումը։ Մենք չենք զիջի ճնշմանը», - գրել է Նիլսենը Ֆեյսբուքում։
Նա հավելել է, որ Գրենլանդիան պնդում է երկխոսության, հարգանքի և միջազգային իրավունքի սկզբունքների վրա։
