Մեծ Բրիտանիան 20 միլիոն ֆունտ ստեռլինգ (27 միլիոն դոլար) կհատկացնի Ուկրաինայի էներգետիկ ենթակառուցվածքների վերանորոգման համար, հայտարարել է Մեծ Բրիտանիայի արտաքին գործերի նախարարությունը։
«Այս ֆինանսավորումը կապահովի կենսականորեն կարևոր արտակարգ աջակցություն՝ ամբողջ երկրում էներգիայի արտադրության վերանորոգման, վերականգնման, պաշտպանության և անվտանգության ապահովման համար` ապահովելով տների, հիվանդանոցների և դպրոցների էլեկտրաէներգիայի և ջեռուցման մատակարարումը ծանր ձմեռային պայմաններում», - ասվում է Մեծ Բրիտանիայի արտաքին գործերի նախարարության հայտարարության մեջ։
Արտաքին գործերի նախարարությունը նշել է, որ հայտարարված գումարը հաշվի առնելով՝ Լոնդոնի կողմից Ուկրաինայի էներգետիկ համակարգին աջակցելու համար 2022 թվականից հատկացված միջոցների ընդհանուր գումարը հասել է 470 միլիոն ֆունտ ստեռլինգի (630 միլիոն դոլար):
Ինչպես հունվարի 16-ին հայտնել է Ուկրաինայի էներգետիկայի նախարար Դենիս Շմիգալը, 2022 թվականի փետրվարից ի վեր երկիրը կորցրել է էլեկտրաէներգիայի «հազարավոր մեգավատ արտադրություն»։
