Ուկրաինայի գլխավոր դատախազության գրասենյակը քրեական գործ է հարուցել Ալեքսեյ Նավալնիի համախոհ Լեոնիդ Վոլկովի դեմ՝ «Ռուսական կամավորական կորպուսի» (ՌԴԿ) հիմնադիր Դենիս Կապուստինի հասցեին հնչեցրած քննադատության համար։ Այդ մասին հայտնում է «ԵԺ» Telegram-ալիքը՝ հղում անելով դատախազության պատասխանին։Ըստ հաղորդագրության՝ գործը հարուցվել է Ուկրաինայի քրեական օրենսգրքի 436-2 հոդվածի 3-րդ մասով՝ Ռուսաստանի հատուկ ռազմական գործողությանն ու դրա մասնակիցներին աջակցելու մեղադրանքով։ Նշված հոդվածը նախատեսում է ազատազրկում կամ ազատության սահմանափակում մինչև հինգ տարի ժամկետով։
Քրեական հետապնդման հիմք է դարձել ՌԴԿ ներկայացուցիչ Աննա Տիրոնի կողմից Facebook-ում հրապարակված անձնական նամակագրությունը։ Դրա շրջանակում Վոլկովը դրական է արձագանքել Կապուստինի հնարավոր ոչնչացման մասին լուրերին՝ դա անվանելով «վերջապես տեղի ունեցած դենացիֆիկացիա», ինչպես նաև կոշտ արտահայտություններ է օգտագործել Ուկրաինայի ռազմական հետախուզության ղեկավար Կիրիլ Բուդանովի և ՌԴԿ-ի հասցեին։ Ավելի վաղ Նավալնիի մեկ այլ համախոհ՝ Մարիա Պևչիխը, ընդգրկվել էր ուկրաինական «Միրոտվորեց» կայքի սև ցուցակում։
