Թուրք փրկարարներին և մասնագետներին երեկ Վրաստան տեղափոխած ինքնաթիռը կվերադարձնի թուրքական ռազմաօդային ուժերի C-130 ինքնաթիռի վթարի հետևանքով զոհվածների մարմինները։ Այս մասին հայտարարել է Թուրքիայի նախագահի աշխատակազմի հաղորդակցության վարչության պետ Բուրհանեթթին Դուրանը։
«Որոնողական-փրկարարական և քննչական խմբերը շարունակում են աշխատել մեր ինքնաթիռի վրա, որը կործանվել է Ադրբեջանի և Վրաստանի սահմանին։
Զոհերի մարմինները կտեղափոխվեն A-400M ինքնաթիռով, որը որոնողական-փրկարարական և քննչական խմբերը Վրաստան է բերել», - գրել է նա X-ում:
Նա նաև շնորհակալություն է հայտնել Վրաստանի իշխանություններին արագ արձագանքման, աջակցության և որոնողական-փրկարարական գործողությունների սկզբից ի վեր բոլոր ռեսուրսների մոբիլիզացման համար:
Թուրքիայի պաշտպանության նախարարությունն ավելի վաղ հայտնել էր, որ նոյեմբերի 11-ին Վրաստանում կործանվել է Թուրքիայի ռազմաօդային ուժերի C-130 ինքնաթիռը, որը թռիչք էր կատարել Ադրբեջանից։
