ԱՄՆ նախագահ Դոնալդ Թրամփը հայտարարել է, որ անհամբերությամբ սպասում է նախագահական նոր՝ Air Force One ինքնաթիռի առաջին թռիչքին, որը Միացյալ Նահանգներին է փոխանցել Կատարի կառավարությունը, հայտնում է CNN հեռուստաալիքը։
Ըստ նրա՝ ինքնաթիռը դարձել է եզակի նախագիծ, որի նմանօրինակն ԱՄՆ-ն չէր կարողանա ստեղծել առանց հսկայական ծախսերի։
Լրագրողների հետ զրույցում, նախքան ԱՄՆ 250-ամյակի տոնակատարություններին նվիրված միջոցառումներին մասնակցելու համար Հյուսիսային Դակոտա նահանգ մեկնելը, Թրամփը հայտնել է, որ ինքնաթիռի պատրաստումն արդեն ավարտված է։
«Ես անհամբերությամբ սպասում եմ առաջին թռիչքին։ Նրանք հենց նոր ավարտեցին բոլոր աշխատանքները։ Ինքնաթիռը հարմարեցրել են նախագահի համար. դա նշանակում է անվտանգության համակարգերի և բոլոր անհրաժեշտ հատուկ գործառույթների տեղադրում։ Ամեն ինչ շատ բարդ է դասավորված, բայց դա հիրավի առանձնահատուկ բան է»,- ասել է նա։
Ըստ ԱՄՆ նախագահի՝ ինքն այս ինքնաթիռն օգտագործելու է այնքան ժամանակ, քանի դեռ չի ավարտվել ամերիկյան նախագահական նոր օդանավի կառուցումը, ինչը սպասվում է մոտ երկու տարի անց։
Թրամփը միաժամանակ բարձր է գնահատել ինքնաթիռի հագեցվածության մակարդակը՝ հայտարարելով, որ նմանատիպ օդանավեր նախկինում դեռ չեն եղել։
«Անկեղծ ասած, մենք չէինք կարողանա նման ինքնաթիռ կառուցել, որովհետև պատրաստ չէինք լինի այդքան գումար ծախսել։ Նրանք ծախսերի հարցում չեն տնտեսել», — ասել է ԱՄՆ նախագահը՝ նկատի ունենալով Կատարի իշխանություններին։
Ավելի վաղ՝ այս ամսվա ընթացքում, Թրամփը նոր ինքնաթիռը ներկայացրել էր Էնդրյուս ավիաբազայում՝ այն անվանելով «աշխարհի ամենաշքեղ ինքնաթիռը»։
Սպիտակ տանը ևս հաղորդագրություններ են հրապարակել՝ նվիրված մոդիֆիկացված Boeing 747-200-ի շահագործումից դուրսբերմանը, որը կատարում էր Air Force One-ի գործառույթները 1990 թվականից։
Ներկայում իրականացվում է երեք Boeing 747-800 ինքնաթիռների վերասարքավորումը նախագահական VC-25B մոդիֆիկացիայի։ Դրանց թվում է Կատարի փոխանցած ինքնաթիռը, որը պետք է ապահովի անցումային շրջանը մինչև նախագահական ևս երկու նոր օդանավերի շահագործման հանձնումը, որոնց արդիականացմամբ զբաղվում է Boeing ընկերությունը։ Այդ աշխատանքների ավարտը սպասվում է մոտ երկու տարի անց։
