Իսրայելի բանակը հարձակումներ է սկսել Գազայի հատվածի վրա և կրակ է բացել տեղի բնակիչների վրա՝ չնայած հրադադարի մասին համաձայնագրին, երեքշաբթի օրը հայտարարել է ՀԱՄԱՍ-ի խոսնակ Հազեմ Քասեմը։
Ավելի վաղ Իսրայելի պաշտպանության ուժերը հայտնել էին, որ զինվորները կրակ են բացել մի քանի կասկածյալների վրա, որոնք շարժվում էին դեպի Գազայի հատվածի հյուսիսային մասում գտնվող ռազմական դիրքեր։
«Այսօր առավոտյան Իսրայելի բանակը ավիահարվածներ է հասցրել Գազայի հատվածին, որի հետևանքով զոհվել են մի քանի բնակիչներ։ Սա համարվում է հրադադարի համաձայնագրի խախտում։
Մենք կրկին կոչ ենք անում տարբեր կողմերին վերահսկել Իսրայելի գործողությունները և թույլ չտալ, որ նա խուսափի միջնորդների առջև ստանձնած պարտավորություններից՝ Գազայում պատերազմը դադարեցնելու վերաբերյալ», - ասել է նա։
«Ալ Արաբիա» հեռուստաալիքը, իր հերթին, հայտնել է, որ իսրայելական հրետակոծության հետևանքով մեկ մարդ զոհվել է Խան Յունիսում, որը գտնվում է հարավային Գազայի հատվածում, և հինգը՝ Գազա քաղաքի արևելքում։
