Հրադադարի համաձայնագրից հետո Գազայի հատված ՄԱԿ-ի խաղաղապահ ուժեր տեղակայելու հնարավորությունը վաղաժամ է և կարող է քննարկվել՝ կախված նրանից, թե ինչպես կզարգանա անկլավում իրավիճակը, ՏԱՍՍ-ին տված հարցազրույցում հայտարարել է ՄԱԿ-ի խաղաղապահ գործողությունների գծով գլխավոր քարտուղարի տեղակալ Ժան-Պիեռ Լակրուան։
«Դեռ վաղ է խոսել այս մասին (ՄԱԿ-ի խաղաղապահ ուժեր ուղարկելու մասին Գազայի հատված): Հիմա կարևորն այն է, որ առաջին քայլը ձեռնարկվել է՝ հրադադար է կնքվել, և փոխանակվել են պատանդներ ու գերիներ։ Մենք հույս ունենք, որ սա կշարունակվի», - ասել է նա ՏԱՍՍ-ին ՄԱԿ-ի խաղաղապահ ուժերին մասնակցող երկրների բանակների հրամանատարների հանդիպման շրջանակներում։
Նրա խոսքով՝ միջազգային ներկայության գաղափարը, այդ թվում՝ ՄԱԿ-ի Անվտանգության խորհրդի մանդատի ներքո, ներկայումս մնում է ենթադրությունների մակարդակում։
«Մենք լսել ենք հնարավոր միջազգային ուժերի մասին՝ ոչ պարտադիր ՄԱԿ-ի հովանու ներքո։ Որոշ արաբական և այլ երկրներ պատրաստակամություն են հայտնել քննարկել նման առաքելությանը մասնակցելու հնարավորությունը, բայց միայն այն պայմանով, որ այն հաստատվի Անվտանգության խորհրդի կողմից», - հավելել է գլխավոր քարտուղարի տեղակալը։
