ԱՄՆ նախագահ Դոնալդ Թրամփը հայտարարել է, որ Գազայի հատվածում իրավիճակի կարգավորման իր ծրագրի առաջին փուլը կարող է ավարտվել հաջորդ շաբաթվա ընթացքում։ Նա այս մասին գրել է TruthSocial սոցիալական ցանցում։
«Այս շաբաթավերջին արմատական պաղեստինյան շարժման՝ ՀԱՄԱՍ-ի և աշխարհի երկրների հետ շատ դրական քննարկումներ են տեղի ունենում պատանդների ազատ արձակման, Գազայում պատերազմի ավարտի, բայց ամենակարևորը՝ Մերձավոր Արևելքում երկար սպասված խաղաղության հաստատման վերաբերյալ։
Այս բանակցությունները շատ հաջող են ընթանում, դրանք արագորեն առաջ են շարժվում», – ասել է ԱՄՆ նախագահը և հավելել, որ հոկտեմբերի 6-ին Եգիպտոսում տեղի կունենա աշխատանքային խմբերի հանդիպում՝ վերջնական մանրամասները մշակելու համար։
«Ինձ ասում են, որ առաջին փուլը կիրականացվի այս շաբաթ, և ես խնդրում եմ բոլորին արագ գործել», – ասել է Թրամփը՝ նշելով, որ հետաձգումը կհանգեցնի «հսկայական արյունահեղության, որը ոչ ոք չի ուզում»։
