Թուրքիայի նախագահ Ռեջեփ Թայիփ Էրդողանը արմատական պաղեստինյան ՀԱՄԱՍ շարժման արձագանքը ԱՄՆ նախագահ Դոնալդ Թրամփի՝ Գազայի խաղաղության ծրագրին անվանել է տարածաշրջանում խաղաղության հասնելու կարևոր քայլ։ Նա կոչ է արել Իսրայելին անհապաղ դադարեցնել ռազմական գործողությունները և հետևել հրադադարի ծրագրին։
«ՀԱՄԱՍ-ի արձագանքը Գազայի հրադադարի ծրագրին կառուցողական և նշանակալի քայլ է երկարատև խաղաղության հասնելու ուղղությամբ։ Իսրայելը պետք է անհապաղ դադարեցնի բոլոր հարձակումները և հետևի հրադադարի ծրագրին։
Անհապաղ պետք է ձեռնարկվեն բոլոր անհրաժեշտ միջոցները՝ Գազա մարդասիրական օգնության մատակարարումն ապահովելու և երկարատև խաղաղության հասնելու համար», - ասել է Թուրքիայի նախագահը X-ում հրապարակված հայտարարության մեջ։
Թուրքիայի արտաքին գործերի նախարարությունն, իր հերթին, հույս է հայտնել, որ ՀԱՄԱՍ-ի արձագանքը «հնարավորություն կտա անհապաղ հրադադար հաստատել
Գազայում, ապահովել մարդասիրական օգնության անխափան մատակարարումը տարածաշրջան և հարթել ճանապարհը երկարատև խաղաղության հասնելու միջոցառումների համար»։
