Քաղաքական կուսակցությունները, ոչ կառավարական կազմակերպությունները և լրատվամիջոցները փորձում են արտաքին աջակցությամբ խափանել Վրաստանում ընթացող տեղական ինքնակառավարման մարմինների ընտրությունները։ Այս մասին լրագրողներին հայտնել է Վրաստանի խորհրդարանի խոսնակ Շալվա Պապուաշվիլին։
«Մենք հետևում ենք կուսակցությունների, կեղծ լրատվամիջոցների և ՀԿ-ների կողմից ժողովրդավարական ընտրությունների վրա հարձակվելու նպատակով իրականացվող տեղեկատվական հարձակմանը։ Մենք հետևում ենք այս ամենին։
Տեսնում եք, որ մենք շատ արագ ենք արձագանքում։ Ուզում եմ շնորհակալություն հայտնել Ներքին գործերի նախարարությանը։ Մենք տեսնում ենք, որ այսօր վրացական ընտրությունների դեմ պլանավորված դիվերսիա է իրականացվում, որը հովանավորվում է դրսից», - ասել է Պապուաշվիլին քվեարկելուց հետո։
Ինչպես նշել է Պապուաշվիլին, Վրաստանում ընթացող ընտրությունները կամփոփեն ընտրական ցիկլը, որը սկսվել էր 2024 թվականի հոկտեմբերին խորհրդարանական ընտրություններով, ապա շարունակվել անցյալ տարվա դեկտեմբերին կայացած նախագահական ընտրություններով։ Հետևաբար, ինչպես հայտարարել է խորհրդարանի խոսնակը, մինչև 2028 թվականը Վրաստանում ընտրական գործընթաց չի լինի։
