Զգացմունքները բարդ են, և չնայած տղամարդկանց և կանանց միջև կան որոշ տարբերություններ, երջանկության և կյանքի բավարարվածության վրա ազդող հիմնական գործոնները, ընդհանուր առմամբ, նույնն են: Սա են վկայում նորվեգացի գիտնականների կողմից անցկացված ուսումնասիրության արդյունքները: Աշխատանքը հրապարակվել է Acta Psychologica ամսագրում։
«Մենք ուսումնասիրել ենք սեռերի միջև եղած տարբերությունները և մոտիվացիայի ու բարեկեցության վրա ազդող գործոնների միջև եղած փոխհարաբերությունները», - ասել է Նորվեգիայի գիտության և տեխնոլոգիայի համալսարանի պրոֆեսոր Հերմունդուր Սիգմունդսոնը։
Նրա խոսքով՝ տղամարդիկ հաճախ ցուցաբերում են ավելի բարձր ինքնաարդյունավետություն և ավելի մեծ կիրք գործի նկատմամբ: Սակայն, այլ ասպեկտներում՝ համառություն, զարգացման մտածելակերպ, կյանքի իմաստի զգացում և ժամանակավոր հուզական փոփոխություններին դիմակայելու ունակություն, գործնականում սեռային տարբերություններ չկան։
Ուսումնասիրությանը մասնակցել են 479 իսլանդացիներ, այդ թվում՝ 336 կին և 143 տղամարդ, որոնց միջին տարիքը 32 տարեկան է։
Ամենաուժեղ կապը, ինչպես ցույց են տվել տվյալները, կյանքի իմաստի զգացողության և դրական հույզերի միջև է։ Անկախ սեռից, ինքնաարդյունավետությունը վճռորոշ դեր է խաղում. որքան բարձր է ինքնավստահությունը, այնքան մեծ է հավանականությունը, որ մարդը կզգա իրեն երջանիկ և հաջողակ։
«Ինքնաարդյունավետությունը տալիս է «ես կարող եմ» հզոր զգացողություն, որը կարևոր է դժվարությունները և նոր մարտահրավերները հաղթահարելու համար», - նշել է գիտնականը։
Հետազոտողների կարծիքով՝ ծնողները, ուսուցիչները և մենթորները օգնում են զարգացնել ինքնավստահությունը՝ ընտրելով ճիշտ մարտահրավերները՝ համապատասխան հմտությունների մակարդակին։ Նման իրավիճակները ստեղծում են «հոսքի» վիճակ, որը ձևավորում է տիրապետման և վստահության զգացում։
Թարգմանությունը՝ Euromedia24.com-ի
