Իսրայելի վարչապետ Բենիամին Նեթանյահուն հետաձգել է այցը Ադրբեջան, որտեղ նա պետք է լիներ մայիսի 7-ից 11-ը։ Այս մասին հայտնել է հրեական պետության կառավարության ղեկավարի գրասենյակը։
«Գազայում և Սիրիայում տեղի ունեցող զարգացումների լույսի ներքո, ինչպես նաև անվտանգության և դիվանագիտական խիտ օրակարգի հետ կապված՝ վարչապետ Բենիամին Նեթանյահուն որոշում է կայացրել Ադրբեջան կատարելիք այցը հետաձգել ավելի ուշ ժամկետների: Վարչապետը շնորհակալություն է հայտնում նախագահ Իլհամ Ալիևին հրավերի համար և գնահատում է երկու երկրների միջև ջերմ և կայուն հարաբերությունները», – նշվում է հայտարարության մեջ՝ առանց մանրամասնելու, թե երբ է պլանավորվում այցը:
Ավելի վաղ Թուրքիայի արտաքին գործերի նախարարությունը հայտարարել էր, որ Անկարան Նեթանյահուի ինքնաթիռին չի տրամադրել թուրքական օդային տարածքը դեպի Ադրբեջան թռիչքի համար։ Հանրապետության իշխանությունները հիշեցրել են, որ Թուրքիայի օդային տարածքը փակ է իսրայելական ինքնաթիռների համար՝ Գազայի հատվածում Իսրայելի կողմից իրականացվող ռազմական գործողությունների պատճառով:
