Կատարի միջնորդները ժամանել են Վաշինգտոն՝ Գազայի հատվածում հրադադարի համաձայնագրի շուրջ բանակցություններ վարելու համար, հաղորդում է Axios-ի թղթակից Բարաք Ռավիդը՝ հղում անելով աղբյուրներին։
«Մանրամասներին ծանոթ աղբյուրի փոխանցմամբ՝ հուլիսի 8-ին Սպիտակ տանը բանակցություններ վարելու համար Կատարի պատվիրակություն է ժամանել՝ պատանդների փոխանակման և Գազայի հատվածում հրադադարի վերաբերյալ համաձայնագրի շուրջ», - գրել է Ռավիդը X-ում։
Նրա խոսքով՝ պատվիրակության անդամները մի քանի ժամ խորհրդակցություններ են անցկացրել Սպիտակ տան բարձրաստիճան պաշտոնյաների հետ, նախքան Իսրայելի վարչապետ Բենիամին Նեթանյահուի և ԱՄՆ նախագահ Դոնալդ Թրամփի հանդիպումը։
Նեթանյահուն Վաշինգտոն է ժամանել հուլիսի 7-ին։ Այդ երեկոյան նա իր առաջին հանդիպումն է ունեցել Թրամփի հետ։ Ինչպես նշում է The Times of Israel-ը, երկու առաջնորդների միջև զրույցը, ըստ իսրայելցի պաշտոնյաների, տեղի է ունեցել «շատ դրական և բարեկամական մթնոլորտում»։
