Թուրքիայի արտաքին գործերի նախարար Հաքան Ֆիդանը հայտարարել է, որ Անկարան Թեհրանին է փոխանցել ԱՄՆ դիրքորոշումը Իրանի միջուկային ծրագրի շուրջ բանակցությունների վերսկսման հնարավորության վերաբերյալ։
«Այս պահին հրադադար է։ Մենք տեսնում ենք, որ կողմերը պահպանում են այն։ Սակայն միջուկային ծրագրի շուրջ բանակցությունների վերսկսման հետ կապված անորոշություն կա», - ասել է Ֆիդանը TRT Haber-ին Բրազիլիայում կայացած BRICS գագաթնաժողովին մասնակցելուց հետո։
Նա ասել է, որ գագաթնաժողովի շրջանակներում այս հարցը քննարկել է իր իրանցի գործընկեր Աբբաս Արաղչիի հետ։
«Ամերիկյան կողմի տեսակետները փոխանցվել են իրանական կողմին», - ասել է նա՝ հավելելով, որ չորս օր առաջ այդ հարցը քննարկել է ԱՄՆ հատուկ դեսպանորդ Սթիվեն Ուիթքոֆի հետ։
«Մենք հույս ունենք, որ այս խնդրի լուծումը կգտնվի բանակցությունների միջոցով հնարավորինս շուտ», - նշել է Թուրքիայի արտաքին գործերի նախարարության ղեկավարը։
