Թուրքիայի արտգործնախարար Հաքան Ֆիդանը Ստամբուլում հանդիպել է պաղեստինյան ՀԱՄԱՍ շարժման քաղբյուրոյի անդամների հետ և քննարկել Գազայում հրադադարի շուրջ բանակցությունների վերջին իրավիճակը, հայտնում է Թուրքիայի ԱԳՆ-ն։
«Հոկտեմբերի 18-ին նախարար Ֆիդանը հանդիպում է ունեցել ՀԱՄԱՍ-ի խորհրդի նախագահ Մուհամմեդ Դարվիշ Իսմայիլի և ՀԱՄԱՍ-ի քաղբյուրոյի անդամների հետ:
Հանդիպման ընթացքում քննարկվել է հումանիտար իրավիճակը տարածաշրջանում, հատկապես՝ հյուսիսում: Քննարկվել է Գազայի հատվածը. նախարար Ֆիդանը հայտարարել է, որ Անկարան կօգտագործի բոլոր դիվանագիտական միջոցները՝ միջազգային հանրությանը մոբիլիզացնելու համար Գազայում հումանիտար աղետի դեմ պայքարելու համար», - ասվում է հայտարարության մեջ։
Հանդիպման ընթացքում քննարկվել է նաև հրադադարի համաձայնության հասնելու հարցում բանակցություններում վերջին իրավիճակը, որը թույլ կտա փոխանակել պատանդներին և գերիներին։
«Հանդիպման ընթացքում քննարկվել է միջպաղեստինյան հաշտեցման գործընթացը: Նախարար Ֆիդանը իր գոհունակությունն է հայտնել Եգիպտոսի կողմից Կահիրեում կազմակերպված վերջին հանդիպման կապակցությամբ»,- ասվում է հաղորդագրության մեջ։
Բացի այդ, Ֆիդանը ցավակցություն է հայտնել ՀԱՄԱՍ-ի ղեկավարությանը Քաղբյուրոյի ղեկավար Յահյա Սինվարի մահվան կապակցությամբ։
